المساعد الشخصي الرقمي

مشاهدة النسخة كاملة : القطار في خارطة الغناء السوداني ... يا كجنكي !!


بدر الدين بابكر مصطفى
03-07-2006, 01:34 PM
دي فاتت عليك كيف ؟
لقيتها فرصة قلت استغلها
ما ذكر القطار إلا وذكرت عطبرة، لارتباطها الوثيق بهذا الفن، فن السكة حديد، فعطبرة تدين للقطار وسكته، وعطبرة عن بكرة أبيها لها علاقة ما بهذا القطار وعجلاته وسككه.

أعذبها وأرقها رائعة بابكر الذّكار
قطار الشوق متين ترحل تودينا
نزور بلداً حنان أهلا وترسى هناك ترسينا

نسايم عطبرة الحلوة تهدينا وترسينا
نقابل فيها ناس حلوين فراقم كان مبكينا

قطار الشوق حبيبنا هناك يحسب في مسافاتك
لو تعرف غلاوة الريد كان حركت عجلاتك
وكان بدرت في الميعاد كان قللت ساعاتك
وكان حنيت علي مرة كنت نسيت محطاتك

قطار الشوق دا ليل الغربة فيهو ودار
لا متين تسرع متين بتكمل المشوار
عشان ما نلقى سيد الناس
ونطفي البينا من النار
نشوف عينيها النعسانة
ولونها الزاهي كلو نضار

يا قطار الشوق

أذكر مرة كنت قادماً من الرباطاب لحضور مناسبة أحد الأصدقاء، في بداية التسعينات، كنت مع مجموعة من الشباب مجدي وفيصل (الزيداب)، بريمة (الدامر)، عوض (ود الخالة)، عادل (خليوة)، ركب معنا رجل في الأربعينيات، فعرفه الشباب مباشرة وحيوه بحفاوة، عرفت أنه بابكر الذّكار، بصوته الشجي اختصر لنا مسافة كانت تستهلك وقتاً وجهداً قاتلين، وأغنانا عن لعب الكوتشينة في عربة الفرملة، مع الكمسنجية... أمتعنا بأغان كنا نسمع بها ولا ندري صاحبها، فكان يغني ويحكي، كانت قطار الشوق بلسماً لنا كلما نال منا الجهد وأزيز القطار، لم نمل تكرارها معه فقد حفظناها منه، ولو استمر ذلك القطار الى يومنا هذا لما مللناه.
انزوى حالياً الذّكار وربما غرق في ورش السكة حديد ولم يجد مجالاً للإبداع... وربما انزوى في منزله تاركاً المجال لمبدع آخر... فنساه الكثيرون، بينما لا تزال رائعته قطار الشوق تحلّق مثل روح معذبة لم تجد مستقراً لها في العالمين، تذكّرنا بجريمة نسيانه وتجاهله، فيستبد بنا الشوق والحزن.
****
وهذه قصيدة قالتها إحدى مبدعات بلادي، ولحنتها وعزفت لحنها بالعود، وغناها عثمان الشفيع...
هذه القصيدة (وكذلك قصيدة الذّكار) يحملها لحنها العذب السلس على راحتيه، فلو تمعنت في كلماتها لوجدتها ضعيفة أو بسيطة، ولكن ألحانها وأشجانها تجعلها محبوبة ومقبولة لدى الجميع.

القطار المرّ فيهو مرّ حبيبي
بالعلي ما مر ونلت مقصودي

القطار يتهادى حلّ في وادينا
يلا نمشي نروح للمن زمان ناسينا
السلامة سلامة ... يلا أنزل بينا
ما مهلنا دقيقة ... بس طار بي محبوبي

آهـ خلاص جنيتا
آهـ خلاص جنيا
وفي المحطة بكيتا
للسعادة الكنت ليها إتمنيتا
قلبي ديمة معاك لو أبيت وجفيت
يا القطار تدشدش يا الشلت محبوبي
وهناك رائعة العطبراوي:
قطارو حلا يا ناس قطارو حل
ترك لي عمري للآلام والمذلة
الزول مسافر أنا ودعتو الله
غاب هلالي الكان لي هلا

الليلة وين حن علي ***

بدر الدين بابكر مصطفى
05-07-2006, 09:14 PM
قطر الخميس الفات
الفرق الحبّان
حبيبي يا حليلو
خلاني للأحزان

قام القطار بدري
وخل الدموع تجري
يا حبيبي طال هجري

يوم قامن القطرين
وخشّن على الجبلين
ليلي انقسم ليلين

لما القطار حلا
أنا قلت بدلا
ودعتو لي الله

وهذه الأغنية (متلوتة)، أي مرابيعها ذات ثلاثة أبيات، ويكرر البيت الأوسط لإكمال الرباعية...
أظنها لإسماعيل حسب الدائم.

الكوبي
06-07-2006, 10:50 PM
العزيز ابوخالد التحايا لك ولعزيزنا كجنكي
وفعلاً للقطار وقع خاص عند السودانيين وخاصه اهل الشمال
وللشوايقه القدح المعلا في ذلك وخاصاً قطر الاحد الذي يحمل
الشوق للمحبوبه لذلك هو اكثر قطار وجد حظه في الاغاني
قطار الاحد الذي ياتي الي كريمه واشهر تلك الاغاني اغنيه
قطار الاحد للراحل النعام ادم وهناك اغنيه جبر خاطر لود اليمني
التي يقول فيها :

احمد الله الخاطر انجبر
وجاني زولاً شايل خبر
قال لي محبوبتك في القطر
ويواصل فيها ويقول
اليله قطرك قالوا وصل بلد "كاسنجر"
وكاسنجر هي اخر محطه قبل دخول القطار الي محطه كريمه
وهي دليل علي اللهفه ولوعه الشوق لقدوم المحبوبه .

كذلك هنالك اغنيه سيد خليفه التي يقول مطلعها
القطر القطر نويت السفر
دمعي انهمر
وكذلك لسيد خليفه ايضاً اغنيه ارض النيل
التي لايزكر فيها لفظ القطار ولكنها رحله بالقطار
تبدأ من ارض الكنانه الي ان يصل الي ام درمان
يصف فيها كل المناطق التي يعبرها القطار .

ونواصل

بدر الدين بابكر مصطفى
08-07-2006, 01:14 PM
الأخ العزيز الكوبي
أتمنى بصدق أن تواصل مداخلات الثرة (الشحمانة) في هذا البوست
لأني بصراحة العندي كملت ...
سأحاول أن أنزل قطار الغرب لمحمد المكي إبراهيم
وهي قصيدة غير مغناة ...
***
كما قلت إنت أغاني الشايقية حافلة بالقطارات
وكلما قام قطر من عندهم أصابهم في مقتل
وجعلهم ينوحون ...
***
نسبة لعدم مرور السكة حديد بنهر عطبرة فإن القصائد تحورت لتصب اللوم على اللواري
والبصات :
شالو الباص وغير حالي
يا ناس الحبيب الغالي
وقد ننحرف بالبوست الى البص واللوري إن كملنا أحوال القطار ...

kijinki
08-07-2006, 01:30 PM
ابوخالد
سلام كتير ليك ولى خالد
انشغلت الايام الفائته...
لكن الكوبى ماقصر....
بجيك بي مهله...
سلامى ل خالد.....

بدر الدين بابكر مصطفى
09-07-2006, 10:38 AM
ابوخالد
سلام كتير ليك ولى خالد
انشغلت الايام الفائته...
لكن الكوبى ماقصر....
بجيك بي مهله...
سلامى ل خالد.....


عزيزنا كجنجي (باوارث)
القروش ما بدت تجي ؟؟؟؟
الكوبي صديقي ، ثبات عقلي ودرقتي وسيفي
حاشاه التقصير ...
وفي انتظارك ... بس أكان تلقى ليك قطر فاضي
لك التحية مثنى وثلاث ورباع

حاطب ليل
10-07-2006, 04:36 AM
لم اركب القطار بحياتي قط ...... و لكم تمنيت بعد الحكاوي التي ترويها لي الوالدة او جدتي عليها الرحمه ...

إن كان بالإمكان فاسمحو لي ان احجز معاكم في القطار دا "اقصد البوست دا "

فما اجمله من طرح و ما اروعكم

بدر الدين بابكر مصطفى
10-07-2006, 10:32 AM
مكرر


*
*
*
****************

بدر الدين بابكر مصطفى
10-07-2006, 10:38 AM
:grin: :grin:
الأخ حاطب ليل ...
وهادي تذكرتك ... إتحكر تب ...
نحن قاطعين فرملة
ولك التحية مثنى وثلاث ورباع

sawra
10-07-2006, 03:28 PM
هنالك كلمات اغنيه لقد غناها الفنان جمال فرفور


لما القطر صفر وشالوا

دموعى من عينى سالوا امسي وبات كيف حالوا


ياربي طارينى في بالوا اه انا مانسيتو عيونو سودا كحيله

بدر الدين بابكر مصطفى
11-07-2006, 08:46 PM
يا ساورا
تحياتي
سمعت الأغنية زمااااان من حسين شندي، زمنو البغني بالرق
تقريباً سنة 86 (الزمن داك أنا صغيّر :D )...
مطلعها بقول :
آهـ أنا ما نسيتو ودعتو الحبيب وسليتو
وفيها بقول :
عيونو سودا كحيلة والبسمة في شفاهو جميلة

ولك التحية مثنى وثلاث ورباع

sawra
15-07-2006, 03:16 PM
الفنان الراحل سيد خليفه غناء





اسالوه قايل الناس نسوه

يوم سافر قطاري ويوم لهلبتا ناري

ويوم ودعتا حبي ياناس انا دمعى جاري

بدر الدين بابكر مصطفى
16-07-2006, 11:44 AM
يا ساورا
شكلك حضرتي سهرة أسماء في حياتنا قبل يومين
:D :D :D
لك التحية مثنى وثلاث ورباع

kijinki
16-07-2006, 12:38 PM
ابوخالد الحبيب
مررنا ل التحيه
وتسجيل الحضور الدائم.....

الكوبي
17-07-2006, 05:16 AM
الاعزاء ابوخالد وكجنكي وباقي المشاركين
لكم تحيه خالصه في هذا البوست الجميل
وفعلاً يا ابوخالد الشايقيه يصيبهم القطار في مقتل
وايضاً يتم وصف عيون الحسناء وتشبيهه بكشافات
القطر مثل اغنيه النعام ادم "فاوضني بلا زعل "
وهنالك من اغنيات الحقيبه الجميله للرائع زنقار
اغنيه " من بف نفسك يا القطار "
وايضا من الاغاني الشعبيه " يا بلالي لول لولينا "
التي ياتي فيها مقطع
المحلي داخل عطبره
والمحلي للذين لايعرفون هو قطار يجوب عطبره ونواحيها
وده ممكن تحكي لينا عنه شويه يا ابوخالد
ولكم تحياتي

بدر الدين بابكر مصطفى
18-07-2006, 01:59 PM
صديقي الكوبي
المحلي دا يا معلم .. قطر بكون ماشي برااااحة، يعني لو ماشي من عطبرة للدامر 13 كيلو بيصل في نص يوم، زمااااان لمان نكون مسافرين لي حتة قريبة، مثلاً ماشين كنور، بربر، دارمالي ، بنتلقى المحلي نأشر ليهو ... ما بقيف لكن بهدن بمشي برااااحة إنت ممكن تركب، حبوبتك ممكن تركب كمان، بس ما تنسى تعصر لك طرادة في يد الكمسنجي، ولو جايي من بعيد وعندك شنط وصفايح وشوال تمر وداير تنزل قبل المحطة أو بعدها بشوية، بتمشي للكمساري تقول لو هدِّن شوية وتعصر في إيدو حفنة قريشات، ما عندك مشكلة بهدن ليك ويكون معاك زول يناولك حاجاتك وتنزل في أمن وأمان في حلتك...
من ضمن حاجات عطبرة الطريفة في المحطة كان في واحد بتاع باسطة بكورك: ما بالسمنة وكدا، ما بالسمنة وكدا، بقولها بصوت غريب كدي زي المخنثين، يوم لمة فيهو عبدالكريم بتاع النظام العام في عطبرة جلدو جلد غرائب الإبل، وقال ليهو تاني ما تقول العبارة دي كلو كلو، فـ سألوه الناس : الليلة مالك ما بتكورك ؟ رد عليهم : ما جلدونا وكدا !!! وصارت زي المثل لليوم الناس بتندروا بيها...
الغنية دي بتقول:
يا حورية سوي المقدرة
المحلي داخل عطبرة
تور القوز أبو بت المنى
البريدو يبرى من الشقى
يا بلالي ليل ليلنا
أغنية من بف نفسك يا القطار لزنقار أغنية جميلة برضو وتقول:
من بف نفسك يا القطار
ولهيب صدرك يا القطار
وين الحبيب
زي ما شلتو تجيبو يا القطار
***
أنا ما داير السفر
لكن بس نفذ القدر
إيه سبب لي الكدر
غير عجلاتك يالقطر
***
إنت جوفك يأكل اللهيب
وأنا جوفي بياكلو اللهيب
ما خليت لي حبيب
غير البكا والنحيب
***
ولك التحية مثنى وثلاث ورباع

زهير
30-11-2008, 11:07 AM
وتابعوا كتابات الرائع بدر الدين فجميع بوستاته جديرة بالمطالعة ..

zainalzaineen
02-12-2008, 03:29 PM
العزيز /بدرالدين
نعلك طيب يابا
الفوق ايديك ان كان بنية ولا وليد ربنا يحفظو ويغتيهو
اهلى الشايقية القطر ده موجعن شديد وباقيلن سبب فراق رغم انو بيجيب الحبان راجعين للبلد لكن كونوا يشيل منهم دى اصلا ما واقعالن .. اماااااااااااااااااانة القطر ده دعوهو دعى
ياحليلة بلا عدد
قالوا شالها قطار الاحد
فى الرصيف حسو بلا الرعد
نسال الله مكنتو تنقد و
وفى الكاسنجر يرقد خرد

والقالوا كتير فى القطر وفى كل وسايل السفر من الطيارة لى الدحيشى ما خليناها
خليك قريب ............ وبجيك صاد

ودالشيخ
21-03-2011, 09:29 AM
http://www.youtube.com/watch?v=wozjUCJJuaY

kijinki
21-03-2011, 12:39 PM
بدرالدين بابكر مصطفى
اين هذا المبدع حياه الغمام 。。。


ودالشيخ تتطلق فينا النار وتمشى :1; (34):