مركز تحميل الملفات



العودة   المنتديات > منتدى الاغاني والفيديو

منتدى الاغاني والفيديو ساحة خاصة بمقاطع الاغاني والفيديو

« آخـــر الــمــواضــيــع »
         :: التماسيح (آخر رد :tolop tolop)       :: امطار غزيرة بالخرطوم وسيول بنهر النيل (آخر رد :tolop tolop)       :: أغنية للبريــدها .. وبتمنى لو اعزف نشـــيدها .. (آخر رد :بشير التوم إبراهيم)       :: حــواء الســودان العظيــمة ... واحشــاني - مزج أخير .. سودانية وخيرك داني . (آخر رد :بشير التوم إبراهيم)       :: حــواء الســودان العظيــمة ... واحشــاني - مزج رابــع .. (آخر رد :بشير التوم إبراهيم)       :: حــواء الســودان العظيــمة ... واحشــاني - مزج ثــالـث (آخر رد :بشير التوم إبراهيم)       :: حــواء الســودان العظيــمة ... واحشــاني - مزج ثـانــي (آخر رد :بشير التوم إبراهيم)       :: حــواء الســودان العظيــمة ... واحشــاني - مزج اول (آخر رد :بشير التوم إبراهيم)       :: عــيدية لي بشـــــــــــارة الخــير حــواء منتــدانا الغالي الحميم (آخر رد :بشير التوم إبراهيم)       :: جيرو شاليم : صحفي سوداني يدعو للتطبيع مع اسرائيل (آخر رد :عُبد)      

إضافة رد
 
أدوات الموضوع انواع عرض الموضوع
قديم 03-11-2010, 03:58 AM   #26
ibnalkeram
 
الصورة الرمزية ibnalkeram
 
تاريخ التسجيل: May 2010
المشاركات: 134
افتراضي

قصة طه ورائعة وود دكين والمك نمر
رائعة العبادى
( 8 )

وبعدين ظهر ود دكين في جماعته جايين علي الفريق
فقال طه :
هداك ود دكين بي زملو بان شفناهو
دار اليوم يروح خلف الوعد خفناهو
الراجل في الاصول ما خاتي لي معناهو
يا ريه استعدي الزول جمعنا عناهو

ولما وصلوهم ود دكين قال ليهم :
ولاد بطحان سلام اهل النبا و الشكره
سلام عز العرب اهل الفحل والبكره
سلام يا طه يا راس الكرم والضكره
جيت لي غرضي يا طيب الاصل والذكره

رد عليه طه :
مرحبتين حباب مرحب خريف الرازه
حباب شيخ العرب البيهو القبائل عازه
حباب سيف العرب البيه هاشه وهازه
في يمنك قبيلتاً ما تقبل فازه

قام عبد الله البطحانى قال : هيا جايهو الزمل
رد شيخ العرب :
خليهو يا عبد الله
غرضي إن ما أنقضى أنا زملي ما بتدلى

رد عليه طه :
الناس في رجاك من الصباح في مله
كدي شوف الطعام شيخ العرب بسم الله

رد ليهو شيخ العرب :
ما بأكل طعام كان ما حساب اتضرب
وقضيان الغرض فيكم حقيقه مجرب
الامر العنيتو وجيتو كان ما ادرب
ما بنفعني اكل وما بروى مهما اشرب

فقام عبدالله وقال:
ياشيخ العرب امرك خلاص همانا
قول غرضك عديل خصصنا او عمانا
هسع نقضى ليك في محلنا اللمانا
كان بي راينا كان بى مالنا كان بي دمانا

رد ود دكين " شيخ العرب: "
عندكم الغرض ما بدور قلم لا ورقه
ماغرضاً تسافرولو وتقيسوا الفرقه
يقضي ان قولتوا خير مابدورلو سيف لا درقه
وان كان قلتوا لا لا يروح شمار في مرقه

ما مقبوض وجيتكم لاجي فوقي جنيه
بي خيري ومراحي وتاني نفسي غنيه
جاييكم نسيب تدوني بطحانيه

رد عليه عبدالله :
خير سميها
رد ود دكين:
في بت ابكبس لي نيه (يعنى عاوز اخطب ريا )

قال عبد الله :
يفتخروا البطاحين ساحتم راحبالك
لكن ريا امرها مقضي من قبالك
فات فيها الفوات لي طه هادا قبالك
من دون ريا قول الدايروا في بالك

ده فريق الصهيباب مافيهو واحده ....ه
مال ورجال وعز في الحله مافي فقيره
كثير الزي ريا مليانة البلد من غيرها
ان درت الكبار وان كان قصدتها صغيره

قام شيخ العرب قال :
إن مال الشجر ما بكسرن فراعو
وقمحان الطلب للمابجيبو ضراعو
ليه يا أهلنا للبيناتنا ما بتراعوا
القال راسي موجوع ما بربطولو كراعو

قام عبد الله قال :
حبل المهله يربط انت ارتاح بيت
بكره نمر سوي ونفلى البيوت بيت بيت
سمي الدايرها ولوم البقولك ابيت

رد عليه شيخ العرب :
يمين بالله غير الغايه مالي مبيت

هنا طه اتضايق من شيخ العرب القالو ليهو ريا دايرها طه وبعد ده ما مقتنع ومصر الا هى بس
فطه قال :
يا شيخ العرب أمرك بشوفو حقاره
وما جايباك مره الجابتك بس غارة
وقرناك كثير ونفسك ابيتها وقاره
خبرك هادا ما دايرلو دق نقاره

قام واحد من اعوان شيخ العرب اسمه علي ووجه الكلام لي طه وقال :
قبلك في اللجج يا طه راحو اتهدو
تتجاسر علي شيخ العرب بتهدو
زولكم ماعقل يا كبارو كان ما تهدو
بعنادوا الفريق خايف يسبب هدو

هنا خلاص االحكاية جاطت الجو اتعكر وقام طه رد لعلى وقال :
انا المالح الكارب خريفي وصيفي
والمتلك تبيع ما اظن يطل فوق قيفي
لو ما الليله في بيتي وبعدك ضيفي
في الشي السمعتو برد عليك بي سيفي

هنا قال شيخ العرب :
كفي يا بطاحين فيكم اتغشينا
كرمكم جانا طامح رخصه اتعشينا
بعد الشى السمعنا كان ما مشينا
خايف في اجتماعنا تقع وقايعاً شينه

في وداعة الله عقب بيناتنا ما في علاقه
وات يا طه اتشفيت شبعتها شلاقه
عمرت الشر سعيت دليتو بي معلاقه
نحن وانتو بعد الليله يوم نتلاقى

قام عبد الله البطحانى عاوز يرضي شيخ العرب ود دكين فقال :
من ولدك زعل كل البلد بتكاورو
ارحكم بيتنا بيتو ونحن زولنا نداورو
نتدابر نشوف نحزم جمعنا نشاورو

رد عليه شيخ العرب :
ضيف الغابه حالف ده الفريق ما أجاورو

قام عبدالله قال :
سمح ارجانا يمكن طه نحنا نجبرو

رد عليه شيخ العرب :
الزول في الرقاد شقو البريحو بخبرو
والزول البليد بي ايدو يحفر قبرو
عاد بنسوي عوسنا وطه يلزم صبرو

رد طه علي شيخ العرب و قال :
سوي الدايرها وكتر الكلام خليهو
والشر القصدتو معاي ابقي عليهو
طير اصل السما حتي القمر دليهو
يوم نتلاقى كل واحد بعرف الليهو

نواصل ان شاء الله
__________________

ibnalkeram غير متواجد حالياً   رد مع اقتباس
قديم 03-11-2010, 04:03 AM   #27
ibnalkeram
 
الصورة الرمزية ibnalkeram
 
تاريخ التسجيل: May 2010
المشاركات: 134
افتراضي

الجزء السادس من الفيديو





[youtube]
__________________

ibnalkeram غير متواجد حالياً   رد مع اقتباس
قديم 03-11-2010, 04:04 AM   #28
ibnalkeram
 
الصورة الرمزية ibnalkeram
 
تاريخ التسجيل: May 2010
المشاركات: 134
افتراضي

قصة طه ورائعة وود دكين والمك نمر
رائعة العبادى
( 9 )


هنا خرج شيخ العرب ود دكين وعيونه يقدح منها الشرار وكبر الشر في نفوس الفريقين
وقام طه جاري في ظهر شيخ العرب ...... قام واحد من البطاحين اسمه احمد مسك طه وقال :

أقيف يا طه عندي نصيحه ليك ابداها
العقده الصعيبه العاقل اتعداها
الشكريه كثره ونحن مانا لداها
انا عندي العرب بى ريا أخير نفداها


رد عليه طه :

ده الراي السديد يا احمد تراك بي فكرك
روح لي ود دكين وريهو يسمع شكرك
يديك مال كثير وقبيلتو ترفع ذكرك
تصبح عمده فوق روسينا تخلف حكرك

قام رد علي طه عمه عبد الله فقال :
ليه أحمد تهينو نصيحتو ما ضاراك
ما حق النقص وانت بتعرفو براك
وكت بتسوي عوسك وما بتشوف بي وراك
نشاور ريا ممكن ريا ما دايراك

رد طه وقال :
صدق القالوا خربانا البلد بكباراها
ديك ريا أسألوها واعرفوا خبارها
من غير السفر ما عندي تاني دباره
نحنا وانتو بي دي الحاله ما بنتبارها

رد أحمد :
يا طه المصائب للقبيله تقودا
مسافر وين مخلى النار بوراك موقودا

طه قال :
انا السمتان جليس الردفولا عقودها
حد السيف بقطع عقدتو المعقوده

ما ولعتها ناراً انتو توقعو فيها
شن دايرين براى وانا نارى مدفيها
أحلف ليك يمين دى الحله متقفيها
باكر من صباحى قبل يحس الفيها

رد عبدالله :
نحن كبار اخيرلك ترضى بعرفتنا
مع الشكريه احسن نشترى الفتنا
ندى ود دكين ريه ونكتل الفتنا
ما من خوف ملاقات الرجال حرفتنا

رد طه :
من الفيها ما بزح ان تزحزح مره
وان حيين نعود ان طال زمنا ومره
عيش الدنيا ان كان يحلى وان كان مرة
الزين ما بدوم والزول بموت فت مره

رد عبدالله :
وكت صممت ما ترجع وتسمع قولنا
وسفرك دا المحال ما بقبلنو عقولنا
الموت ما بنخافو الخوف يمبن مو هولنا
بنعاين بعيد بنخاف بهادل عقولنا

الشكريه بي سيوفهم صغيرنا معتق
ما بنابى الكتال ونقول جرحنا ...تق
مرحبتين حباب الشر محل ما بتق
تنقد الرهيفه انشاء الله ما تتلتق

رد طه:
الشكريه غوش واكتر علينا حساب
ضيف ليهم لميم ما بتربطو الانساب
انا لي غارتهم حسبت الف حساب
كان تتعدوا راي يمين عقابكم ساب

بجيكم حمد ومعاه الرجال تابعاهو
قولوا ليهو طه طفش وريا معاهو
كيف نرضي السفيه الادبو ما برعاهو
يرفض طلبك انته ونحن كيف نسعاهو

ابقي قاصدو وحدي والقبيله محايده
عقبان ان رجع فوقو الخسائر عايده
وانا كان دارني انا ما ابترجع جموعو الزايده
وان حصلني حت ما اظن يعود بي فايده

رد عبدالله :
ما بقيف ود دكين واصلو السرج ملحوق
في دربك بسوق يا طه ياك ملحوق
وات صنديد تصد الميه ماك ممحوق
بنخاف كترهم وايد الرجال بتحوق


رد طه:

ليه خايفين علي؟؟ الدنيا عيشا مخاطر
الواجب نسوي ونرجي ستر الساتر
في وداعه الكريم الليله نيتي انا خاتر
يا دار ريا ما كان الفراق بالخاتر

كفايه مع السلامه انتهينا خلاص
غير الشوره دي ما لينا تاني خلاص
في يميني اب حريره الدكري القصاص
ما بخاف ود دكين ان جاني بي رصاص

يخرج طه من المجلس ويحاول احمد ان يوقفه فلا يلتفت اليه
فيقول احمد لعبد الله:

عم عبدالله خبرك هادا شيتن فاجع
كيف بنطاوعو من بيناتنا يطفش ناجع

عبد الله :
سمعتوا كلامو من الفيها ما متراجع
في الشئ الشايفو قط بي هينه ما بعود راجع


احمد:
نركب نلحقه نخليه يمشي براهو ؟؟؟


عبد الله:
شورتو القالها اخير من نلحقو ونبراهو
العاقل بحسب حساب للتجي متافراهو
ويفكر علي القدامو والبي وراهو


احمد:
فوقو بسوقو قط في ظني ما بخلوهو
كيف موقفنا ساعه يلحقو يكتلوهو ؟؟

عبد الله :
ان وقع القدر ما بتقدروا تصدوهو
ادوكتو الكلام هسع اخير قلوهو

وينفض المجلس بانتظار ما تاتي به الاقدار


نواصل ان شاء الله
__________________

ibnalkeram غير متواجد حالياً   رد مع اقتباس
قديم 03-11-2010, 04:06 AM   #29
ibnalkeram
 
الصورة الرمزية ibnalkeram
 
تاريخ التسجيل: May 2010
المشاركات: 134
افتراضي

الجزء السابع من الفيديو




[youtube]
__________________

ibnalkeram غير متواجد حالياً   رد مع اقتباس
قديم 03-11-2010, 04:08 AM   #30
ibnalkeram
 
الصورة الرمزية ibnalkeram
 
تاريخ التسجيل: May 2010
المشاركات: 134
افتراضي

قصة طه ورائعة وود دكين والمك نمر
رائعة العبادى
( 10 )



خرج وطه وريا وتوجها الى شندى
وارهقهما التعب فجلسا ليستريحا ويكملا المشوار الى بلد المك نمر
وابتدا طه يغازل ريا فقال ليها:

درقي يكركب كمه ركبي يشيل دي الهمه
اصلي بطرز رمه مني تحود الامه
جملي يكسر الهربه سيفي يحل من كربه
قلبي سمينا تربه ما بتقماني الغربه

يا ريا الحلم ما شفتي كيف اتهول
...سر براهو وبالشين علينا اتاول
داخل راسي فكرا من ما بتحول
بكتلو ود دكين ان كان قرب وان طول

ريا:
اسود ود دكين بي اسمه ما تحجينا
هو الفرقنا قمنا من البلد هجينا
عقب في دار جعل تاني الخرابه بجينا
ما بسوي الرماد المك نمر بحجينا

طه :
تلاتة ايام قهر ماشيها بي كرعيا
ليلة وضحوه وكان معاي سعيه
هسع مشينا يومين لا فتقه لا في رعيه
كيف يلحقنا دون شندي ومعاه معيه ؟؟

قبيله دار جعل محميه فيها اسوده
تقدل بالمكارم ديمه فاجعه حسودها
راسا المك نمر كل القبيله يسودها
ركازه القبايل في السنين السوده

بكره نجيهو اب سيفا يجز بولادو
العز والكرم من الكبار تيلادو
ما اظن ود وكين بي شينا يوطي بلادو
ماخد بت اخوه شمه ام اولادو

ان ودعتك المك ما بخاف المتلو
اهون من شراب المويه عندي اكتلو
ارجع للبطاحين تاني راينا نفتلو
الشكريه تغيو وغير حرب ما بتلو

يا ريا البطاحين اصبحت محقوره
علي الشكريه دايما سارحتهم معقوره
ما بتلقالا عز وتعيد مكانه وقوره
الا تلب الغاره وتغدي صقوره

ريا:
في دار الشديد ابقالنا قوم دربنا
بي وصفك دحين من شندي نحنا قربنا
ما بنفتق عشا بالفتقه دي تسربنا
ما بنومو الرجال يمك يمسكو دربنا


هنا يسمع طه حركه خيول قادمه فيقول لي ريا:

بسمع حركه
ريا:
شد ديل يبقي رعاويه

طه:
حركه صهب ده ركب سروج ما حويه
قربت مننا وفي ظني ناسه شويه
كان ناس فزع ما بجيبو حته ضويه

ريا:
ياهم ناسنا خمسه عقاب رجالهم وينو؟
بتشوف ود دكين برز براهو هوينو


طه :
الشي البينا نحن سعينا لي تهوينو
ضايقنا اب فعج ما ظن يعود لي عوينو

الناس المعاه عرب صعيد يا ريا
ما اولاد عمو ديل والله ما شكريه
معروفين تمام في كل بلد اجريه
كان حفرولو بير ولقوهو شجره ضريه

الجاينها بحكيها ليك اجمال
قايمين من هناك بارنو بي امال
عارفين ود دكين ما بهم بي خيل وجمال
بكتلني ويسوقك وهم يسوقوا المال

وان مات ود دكين ودي الظانها في فكرى
بتشوفي الفضائح الما بتجيك من شكري
الشكريه فرسان ومستحقين شكري
ده الصح قلتو ليك انا لا بخاف لا مكري

المهم ريا قالت لي طه :
يا طه استعد الناس عنونا عديل


طه :
وين شفتي القطابي مسوي همو قديل
بضاير العوق اخوك الما بهم من ديل
براك بتشوفي ياما اشبعن بهديل

وهنا حضر شيخ العرب ومن معه ليبادر ود دكين: شيخ العرب طه قائلا:
اتعبت الزمل حفيت وراك متسبقه
احسن ليك ...ت ريا وتحل الربقه


طه:
كان كل القبائل جات علي منطبقه
افوت من ريا يا شيخ العرب؟؟ ما بتبقا

ود دكين:
البلقي القبائل ما بسوي سواتك
خربت قدلتك يا طه وين دعواتك
تاني بعد جريك البشهدنبو اخواتك
فارقك الثبات فارقت درب ابواتك

ابواتك تلوباً كانوا باعهم طائل
البحجة للمرقوب واعدلو المائل
سويت باعك كراعك ما بتهم قول قائل
افووو يا ود حسين فيك الشراد ما خائل

ابقى لى نصيب احجاك وامن روعك
قول الدايرها فى المال اجيك فى طوعك
من هذا الغرور يا ولدى اوعى رجوعك


طه :
يا شيخ العرب جربت لحسه كوعك ؟؟؟؟

كل ما اوقرك في الشين اراك تتقدم
اتعكنن خلااااااااااص انا صبري حصنو اتهدم
اصلو البينا ما بتنفكا من غير دم
الكاينه التكون بي وراها ما بتندم

قام واحد من جماعة شيخ العرب وإسمه عمر شماتة فى طه يقول :
اصلو الخمله ما بسمع نصيحه الهادي
اول خفنا ليك من البهادل هادي
يا طه البهدد ما بضرب الوادي
يمشو عليه الرجال يجري ويقبل غادي


طه :

هسع تشوفو ان كان صح وكان تهديد
وصلتو الميس ده حين وحديد يلاقي حديد
بنبرش الطروره ويثبت الصنديد
خليهو المضي لاقي البجيك جديد

عمـر :
نافذ فيك قدر يا طه انت عميتها
في الهرُّب وقعتها عترتها ما سميته
منه وجاي قضيت وبقيت خلااااااااص زول ميته
في تركتك كفاي انا بركب اب سوميته

( ابو سوميته ده الجمل بتاع طه )

طه :
الداير الغني يعمل حساب لي فقرو
كعب الضله كيف المتلي انت تحقرو ؟؟؟
اب سوميته خلي الليله سيدكم اعقرو
وين تاني الملاج وكتين يتلب صقرو

ود دكين :
لم باقي الكلام يا طه بهمك سرب
جييييييييتك استعد


طه :
مرحب حبابك اقرب
من قومه الجهل انا لي لقاك مدرب
يا شيخ العرب الليله نجمك غرب

وهنا دارت المعركة بين ود دكين وطه ليتمكن طه من قتل شيخ العرب ويلتفت الى من كانوا معه
ويقول طه :

تري شيخ العرب قبض الربح من تجرو
اتوسد تقيله انشاء الله ثابت اجرو
وانتو الشوره كيف عندي الزمل وبحجرو
صنقعو ده السماء بطيرو ولا بتجرو ؟؟؟

فقال واحد منهم اسمه احمد لعمر وبلغ به الخوف ما بلغ

ابرز يا عمر الروح في ايد الخالق
بتجابه الضرب في الدرقه ساسك غالق


فرد عمر لاحمد :

عان ده الخشيم دايما تنط متشالق
ما تنزل عليه مالك ات ماك بالغ


طه :

ضربي صعيب علي وصف البوصف عازر
في غارب التلوب انا نايبي دايما غارز
اسمعو يا طمش كان ما يجيني مبارز
واحد منكم بضرب طرف ما فارز

تري اب سوميته اركب يا عمر سافرتها
قبيل وقت الكلام زي الاسد طفرتها
مال دمك بهت متل القول جفرتها

عمر وقد ارتعدت فرائصه:

من القلتو ليك انا عديييييل تبت واستغفرتها

طه :
انا علي حلف ان كان بقيتو سريه
منكم انتهي قبال تجي العصريه
جيتكم استعدوا تاني ما فيش ريه

هجم عليهم لكن جروا واحتموا خلف ريا وقالوا بي صوت واحد :
هاديل السيوف واقعين وراك يا ريا


طه مخاطباً ريا وقد احتمى بها هؤلاء :
يا خدره المفرهده فوق جروفها نديه
علي الواقع وراك انا كيف اشيل ايديها
حتي كان كتلني عافي ليه الديه
دمي ومالي هيلك واقبليه هديه

ريا مخاطبة عمر ومن معه :
رجال التابه انتو الستره تب ما فالكم
اتامنتوا قوموا وامشوا سوقوا جمالكم
حت مال ود دكين سوقوهو يتبع مالكم
نمشي في حالنا نحن وانتوا تمشوا في حالكم


طه :
زايله رقد ود دكين اسد القبيله الراعي
كان ما ضايقني هو ما كت قطعتو ضراعي

ريا :
تتاسف ليه ليه كان دار يجز براعي
والنعلات حرام ما تضوقه تاني كراعي


طه :
موت المتلو نقصان للعرب في الجمله
كان راس القبائل وهو البقود الحمله
اطرا فعايلو جفني يجف بعد ما يمله
كما شويييه كان داير يعمل العمله

وتوجها الي شندي حيث المك نمر ونرى ماذا دار فى دياره





نواصل ان شاء الله
__________________

ibnalkeram غير متواجد حالياً   رد مع اقتباس
إضافة رد

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع


الساعة الآن 03:30 AM


Powered by vBulletin® Version 3.8.7
Copyright ©2000 - 2014, vBulletin Solutions, Inc.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل الرأي الرسمي لصاحب الموقع أو سودانيز اوف لاين بل تمثل وجهة نظر كاتبها .