من روائع الشعر الشايقى- شُوقـِـى أنا للـبلدْ بى حاله والشُّوقْ لى الترَابله أهلى

[نبض الحياة]

شُوقـِـى أنا للـبلدْ بى حاله والشُّوقْ لى الترَابله أهلى
مغسـتى أنا لى شَقاوْتى رَحلتَ سَاكتْ مَا قعدْ قـبــَـلـِـى
سَــاكتْ ما صبرْتَ قعَدْتَ وسْط أحبابـِـى وسْـط أهـلـِـى
قمْتَ شَلاقه بسْ سافرْتَ جيتْ للغـُرْبــَـه والــهَــمَــلـِـى
أغرَانى السَّفرْ وأحْوَالو كانْ شايلنـِـى عـَـادْ جـَــهـَــلـِـى
دَحينْ أرْقى الشَّـ رقْ يا حليله كيفْ الشُّـورَه كيفْ حللى
إتذكرْ كوَاريكْ ليلـَى ليــكْ يا شَادْيه قومى تعَالى منسَلى
شقيشْ كتى نانْ وينْ طرْتى هاكْ شيلى الفطـُــورْ دَلـِّـى
فتشـِـى دَانْ صَفيحْ المُويـه شُوفى بكانو وينْ شــيــلـِـى
سَوِّى قدُرْ قدُرْتكْ فيـهُو ناصصـِـى إنـْــتـِـى لا تـَـمْــلـِـى
اوْعى العــِدِّى مَا تـَنسيهَا والوَاقــُـــودْ تقــِــيــلْ خـَلـِّـى
عَشَانْ أنا مَاشى اخرْتْ اللوبى بمشى أغـشَاهوبى عدَلى
نضّفى عيشْنا للطـَّـاحونه عاد لامَنْ يجــِيــكـِـى عـَـــلـِـى
لأنو أبوكى مَاسْكْ المُويه قالو أمـشْ الطـَّحـِـيــنْ بـَـدَلـِـى
مَا شُفـْتـيهُو كـيفْ يا شَادْيه قـالاهو السَّمُومْ دى قــــلــى
منْ قومْة الصَّــباحْ للـغيبه صَالاهـُو الهجـيــرى صَـــلـِـى
منْ بعـْــدْ التـَّعَـبْ يا الله زيدُنْ فى الهَـــبـُــوبْ مَــهـَـــلـِـى
دِى سَاقة ً لا شجرْ لا غيمَه عدْمَانـِى الضِّلـيلْ سَــهـَـــلـِـى
متـينْ أرْجـَعْ وأعـُودْ يا اللـَّه لـِى قيـزَانـَّـا لـِـى هـَـجـَـــلـِـى
أنزلْ فوقْ قشيـشْ السَّـــابْ أحشُّو وأعدِّمُـــو السَّـبـَـــلـِـى
وأشيلْ طينة الجـُّرُوفْ فى إيدَيْ أنـشَـط ْوتبْ يرُوحْ كسَلى
وأزَغـردْ فى بيوتْ الطـِّـينْ والكـُـونْ كلـُّو يبْـقـَى أهـَـــلـِـى

[عبدالمنعم محمد]

يا سلام عليك يا نبض الحياة اختياراتك جميلة
يارت تتم جميلك وتنزل اغنية طيبة القرية
هيلت ود اليمني

[شايقية عسل]

رائعه في اختيارك ..شوايقه وبس والباقي ياكل خس.
هههههه.امزح لاتزعلو

[سيف النجومي]

المشاركة الأصلية كتبت بواسطة شايقية عسل

رائعه في اختيارك ..شوايقه وبس والباقي ياكل خس.
هههههه.امزح لاتزعلو

انا غايتو زعلت ياعسل

[شايقية عسل]

كلكم على راسي ..والسودان وحدة

[شايقية عسل]

أم الحسن.

وقفت بعد حلبت لبينة الشاي تكورك يا الحسن.
يا ام الحسن وينو الحسن.
ولمن صفت رغوة شخيبات اللبن في حلتا المبنية من طبق السكن.
واقفي في حوش البهايم ولسع تكورك يا الحسن
جاها حسا من بعيد مارق من القاطوع ورا
قال ليها خير يا الحاجه خير.
قالتلو خير تعال لي جاي دايراك تعنون لي جواب يا الراسي لي ولدي الخدير.
لا تبقي زي شافع السرير يقول لي زين آيمة زين وزين تبقي بعد شهير.
وان جاني يكتب فد سطير.
اقولو يا سجم السجم انا زي قرايتك ما قريت لكن عويناتي بيفرزن الوريقة البيضاء من لون القلم
بعد المغيرب بي شوي جاها الحسن تعبان يسير
دا العشى غنمو من الدرب وسرقت ندي وشو الهجير
سوتلو شايا بي لبن قرض معاهو حرف فطير
قالتلو بسم الله قول واكتب وصيتي انا للخدير
الزمن يا ولدي ماحقاهو السنين
البعيش في الدنيا ما بعيش مرتين.
العمير فاضل لي بس منو اليقين
وانت طول(ت) في البنادر يا الحبيب لا متين
تعال اوريك حق ابوك الجم حقيق حاج اللمين
ان عرفتو بلا عمار يقولو ولدا عندو طين
العلاج لا تنسي رسلو لي دحين
العوينات يا جناي شوفن ضنين
سلامنا ليك مطرز للبنيات والبنين
ولو الارض يا ولدي تنشال في الايدين انا

[نبض الحياة]

عبد المنعم محمد
شايقية عسل
سيف النجومى
______-
عطرتم البوست
و نوعدكم بالمزيد من شعر الشوايقة الجميل