مركز تحميل الملفات



العودة   المنتديات > منبر الأعضاء الـحــــر

منبر الأعضاء الـحــــر لمـنـاقـشـة المـواضـيع العــامـة منتدى خاص بالاعضـاء

« آخـــر الــمــواضــيــع »
         :: تحركات المعارضة اليوغندية للإطاحــة بنظام موسفيني (آخر رد :المنصورى)       :: عزاء واجب (آخر رد :ود الجريف)       :: الدنيا (آخر رد :نارديس اجانق)       :: امريكا تدفع 140 مليون دولار لنشر الإيبولا (آخر رد :عبد الرحمن المنصوري)       :: المخالفة لـ tolop tolop: Inappropriate Language (آخر رد :ود الشيخ)       :: منظمة أطباء بلا حدود سبب الايبولا والكثير من الامراض .. (آخر رد :Rami)       :: الجنوبِيات (آخر رد :نارديس اجانق)       :: صوت شكر وامتنان للشعب السعودي (آخر رد :نزار العمدة)       :: ملطشة القاهرة (آخر رد :نزار العمدة)       :: مصابك سميرك .. (آخر رد :زهرة الروض الظليل)      

إضافة رد
 
أدوات الموضوع انواع عرض الموضوع
قديم 21-08-2005, 07:47 PM   #51
عطـــبراوى
رحمة الله عليك أبا روان
 
الصورة الرمزية عطـــبراوى
 
تاريخ التسجيل: May 2005
الدولة: في رحاب الله رحمة الله عليه
المشاركات: 3,014
افتراضي

وين البيكى بتصبَّح تسُرى عيونى ..
ومتين يا ظروفى بتحنى وعلىَّ تهونى ..
بدور الجيَّه من دونك مضلِّم كونى ..
أياماً قلايل ربك بقول لها كونى ..

هذا المسدار عندما ضاقت به الوسيعة وقبل أن يرجع آفلاً ..
------------------
مى منبهله فوق أصفاحها مردوم دوفه ..
قبضة ضميرها ، زى طى الحِجاب ملفوفه ..
شغلت فكرى خلت رأسى عِدم الصوفه ..
بقيت أجى فى الديار اسرح افوتن حوفه ..
------------------
عالى سديرها موج وفى الوسط مِنْزَرَّه ..
وتزيل اكدارنا البيها القلوب مِنْسرَّه ..
شِن تشبه بلا الضَرب القِليعه وفرَّ ..
حُضْنَها دافى فى الصقط أب صليل والقرَّه ..
------------------
وهنا المسدار الأخير لأخونا هاشم عن الغربة ..
عيشتاً فى قلق زنقه وسموم وسخانه ..
وناساً بنسو للعشره وقلوب وسخانه ..
حليل البِسنِد المايله ويسد الخانه ..
وحليل البحفظ الود والعهود ما خانه ..

وسلامتكم ......
__________________
----------------------------------------

الفرق بين العصيدة والمديدة قبضة دقيق
عطـــبراوى غير متواجد حالياً   رد مع اقتباس
قديم 21-08-2005, 07:54 PM   #52
عطـــبراوى
رحمة الله عليك أبا روان
 
الصورة الرمزية عطـــبراوى
 
تاريخ التسجيل: May 2005
الدولة: في رحاب الله رحمة الله عليه
المشاركات: 3,014
افتراضي

المسدار ده للضكير ..
جبدتو حناسه حليت القشاط من غِردو ..
عند الحادق المتبور وسابل عِرضو ..
المنو القلب دايما متوه فرضو ..
هادا هو المخلى القلب منوسر برضو ..
__________________
----------------------------------------

الفرق بين العصيدة والمديدة قبضة دقيق
عطـــبراوى غير متواجد حالياً   رد مع اقتباس
قديم 21-08-2005, 08:04 PM   #53
عطـــبراوى
رحمة الله عليك أبا روان
 
الصورة الرمزية عطـــبراوى
 
تاريخ التسجيل: May 2005
الدولة: في رحاب الله رحمة الله عليه
المشاركات: 3,014
افتراضي

المسدار ده للفرجونى ..
تلاته سنين نجيع فد مشوار ..
بعاد من الأهل جملة ونواحى الدار ..
فى قفانا يا الصديق سحابا تار ..
ردع العالى سيلو وجف جابلو خدار ..
........................
ويرد عليه هاشم ..
غربه وفرقه تب يا أميرنا ما بتندار ..
تزرع فى العنب تلقى الحصدتو عدار ..
ظروفاً قاسيه يا أمير والزمن غدار ..
عزانا نغنى ننظم بالعذاب مسدار ..
........................
ويحن للبلد أكثر فيقول ..
حلات القمره فى الحله وليالى الصيف ..
حلات النيل وقت يطمح يقالد القيف ..
حلات ريحه الدعاش والمطر هتِّيف ..
وشاى الرايقه يا حليلو البتم الكيف ..

والى لقاء ..
__________________
----------------------------------------

الفرق بين العصيدة والمديدة قبضة دقيق
عطـــبراوى غير متواجد حالياً   رد مع اقتباس
قديم 21-08-2005, 08:11 PM   #54
alhmbati
Guest
 
المشاركات: n/a
افتراضي

أياماً قلايل ربك بقول لها كونى


عطبراوى هادا دفك ابوى الله يخدر ضراعك
  رد مع اقتباس
قديم 21-08-2005, 08:20 PM   #55
عطـــبراوى
رحمة الله عليك أبا روان
 
الصورة الرمزية عطـــبراوى
 
تاريخ التسجيل: May 2005
الدولة: في رحاب الله رحمة الله عليه
المشاركات: 3,014
افتراضي

عفوا كان مسدار هاشم الأخير ردا على الفرجونى عندما قال ..
إيد بلدنا غطاها الرشاش بالهيف ..
واستشرى وقبض ضحويهو مابى يقيف ..
يسوق البرق يكب الصافى من غير زيف ..
حمانا النار منع شاى الضيوف والكيف ..
.....................
تسلم يا الهمباتى أخوى وادنا من عندك .
__________________
----------------------------------------

الفرق بين العصيدة والمديدة قبضة دقيق
عطـــبراوى غير متواجد حالياً   رد مع اقتباس
قديم 21-08-2005, 09:36 PM   #56
alhmbati
Guest
 
المشاركات: n/a
افتراضي

كان الشريف ابراهيم ود الهندى يقيم حفلا كبيرا فى البطانة دعى اليه كل قبائل البطانة وكان ذلك بمناسبة اطلاق سراح قبيلة الجبوراب الذين كانوا قد اعتقلتهم السلطات فى اعقاب مشكلة كبيرة حتى سمى ذلك العام بسنة الجبوراب وكانت الحفلة جامعة للقبائل بما فيهم الرشيادة والزبيدية الذين يسكنون البطانة كما وجهت الدعوة ايضا الى ود كرار ناظر البشاريينوايضا كان الاحتفال يضم سبق الهجن والسبق كان هو الدافع الحقيقى لتلك الدعوة حيث قدم فيه على ود علبدالرحمن كاسا للسباق فى تلك المناسبة وكان لود كرار جمل مشهود له بالفوز فى تلكم المناسبات وقد سبق الجمال واحرز الكاس للمرة التانية
والكاس يجرى عليه السبق لثلاث مرات متتالية وقد احرزه جمل ود كرار مرتين مما جعل الزبيدية والرشايدة يصرون على اخذهم بثارهم بان يتسابقوا مرة اخرى وهنا يدعوهم ود كرار لحضور مراسم زواج ابنه فى قرية بعلوك وقبل الرشايدة والزبيدية الدعوة

وجاء اليوم المشهود وتجمعت القبائل واقيمت الافراح وذبحت الذبائح وظللت الاشجار الكبيرة بالبروش وامتلات بالناس حيث اتوا من كل فج واقيمت الاحتفالات وزغردت النساء وتغنت الغوانى ودقت الدفوف فى حفل لم تشهد البادية واقيم السباق فتقدم جمل ود كرار واحرز الكاس وتحركت السيرة من البطانة الى بورتسودان وتحرك الضيوف فالى هناك لنعيش تلك الفراح من خلال شعر شيخ عبدالله حمد شورانى

بدرى العيش معول فى جرايدك ساسه
وركابك يقول تعبان وداير راسه
تحوير ام ابوك السيده بره نحاسه
خلاك معرض الميدان ...ز بكاسه

بعد القود مشن الميس ودارن الجيه
خليتن بشوفتك بعيد بالليه
دخلت الميس مشوش وجارى سرعك حيه
فز بالكاس برنجى والتانى فوقك بيه

جنيات الجرى الجدعو المخلف وقفوا
شوفن ليه عند الميس محل ما لفوا
ود الدينكى بدلعو وسراعت كفو
شال الكاس ونصر الواقفين فى صفو

ابوك الدينكة شوح وحسابو كله مهوره
امك نذره مى الهشره البتمله الكوره
يالعاصى الجريك طولت نفس مى فوره
جبته الكاس قلع من غير حناسه وشره

يا الشوح افدع العرقوب طويل الغارب
فارط ولسماح لون القلايد خارب
فت فارق بعيد والتانى ليك مو مقارب
فز بالكاس برنجى مخلى زيطك ضارب

عنانيف الجرى الفى الميس بهبرو ذمامن
من ما اتوجهن راجعات طرز قدامن
ركابك يشد رسنه ويهز مطامن
الكاس جبته غير واسطه قواده وكامن

ادرع قرح الريل ابلبايا باين
روصع وفط الميدان سبق جراين
بالمصعى ورحيله الغير ما تسوقه كماين
شال الكاس وذمل الميس عيونه تعاين

ياللخدر عنانيف الجرى الندار
عليك اتافزعن دايرات خلاص التار
بعد روحبهن ميس العناد الحار
جيت قدامى مخلى الوراك كتار

ابقنفه البجازى الصيف ويرعى عفاهو
روصع وذاع وراح بالواسعة صدره ملاهو
بالمصعى ورحيله المافى من ببراهو
شال الكاس ونصر بالنصره وجاراهو

الغناء دا كان فوق الجمل لمن فاز اها هنا بنجى لغناء السيرة والعرس

قبال ايوم التلات البوشه سيد مواعد
سبعه ايام تمتم الديش مديم وقاعد
خيرا مستمر واصل القريب والباعد
ضبح وخسارة كميات والله يساعد

اولاد الكريم بوشن قبايل جنه
تلات جزرات وجخصين وغنم تبعنه
لامن تانى ناقة وديف سريع لحقنه
هسع جديد قضى واكفايه قعدوا يهنه

البوش يومه فات والديش وجود ما اتحول
فوق لازم اب كريق الضيفه ما بقول طول
الفضلى العليه بخالة ما بتتاول
لزمل الضيوف مخزن ملاه شوول

وريث كرم الجدود الفضله ماشى عديل
يقيف فى الفاقه مها تزيد بشوفه قليل
قال للراح يوزع فى العلوق لا تكيل
يات من سيد جمل يدخله براه يشيل

كتير من قلبه مؤمن بيك وفوقك ايم
عندك مستمر ضبح ام سناما قايم
كل الديش عموم المستقيم والقايم
يات من كان يقول ان شاء الله خيرك دايم

المكرمته زى عين البحر متنابعه
خلاوى مفروشه مضيوفه ساقيه وشابعه
خترانه الكرامه وقمنا يوم السابعه
بتكسى ولوارى الدامر المتابعه

خطيبن جاب حقائق وزدنا منه كيوف
قالو الحفله لامن العين براها تشوف
حكاماتنا عندهن امتياز معروف
جنين الساحه يفرغ وينال تانى ضيوف

بعد قفلن النشايد وحفله العصريه
قدموا وودعونا الربتطن مى نيه
قمنا على المحطه معانا كم عربيه
عمران التذاكر قطعن كميه

الورثه العزاز وملوك وممتازين
ليهن وللجماعه مبدرين حاجزين
النقاره تلبخ والجنين هازين
كماسرة القطر من شوفنا منحصبين

اهد الساعة واحده جينا بورتسودان
خبرنا سبقنا عند مسكن السكان
جنيات اتبرا السايرين مع العرسان
سيافن مفضض وقلبهن طغيان

اتخلصنا من قطر المحطه الجارى
لافين ديم عرب شاحنين تمانيه لوارى
كان نتكلم الحاصل صحيح ما نبارى
بوشن جردته كميات وضبحو مسارى



اسغفر الله العظيم

اقعدوا عافية
  رد مع اقتباس
قديم 22-08-2005, 09:25 AM   #57
عطـــبراوى
رحمة الله عليك أبا روان
 
الصورة الرمزية عطـــبراوى
 
تاريخ التسجيل: May 2005
الدولة: في رحاب الله رحمة الله عليه
المشاركات: 3,014
افتراضي

تعرف يا الهمباتى . هذه صفة أخرى من الصفات االتى
يتحلى بها أهلى هناك . فمن غير الشعر هم أكرم من حاتم .
هم يلحقون الملهوف وينجدون المغيوث .هم كما هم لم يغيرهم شئ .

المكرمته زى عين البحر متنابعه
خلاوى مفروشه مضيوفه ساقيه وشابعه
خترانه الكرامه وقمنا يوم السابعه
بتكسى ولوارى الدامر المتابعه

فوق لازم اب كريق الضيفه ما بقول طول


يقيف فى الفاقه مها تزيد بشوفه قليل
قال للراح يوزع فى العلوق لا تكيل
يات من سيد جمل يدخله براه يشيل


قمنا على المحطه معانا كم عربيه
عمران التذاكر قطعن كميه

شوف الكلام ده كيف ؟؟ كرم ما بعده شئ ..
__________________
----------------------------------------

الفرق بين العصيدة والمديدة قبضة دقيق
عطـــبراوى غير متواجد حالياً   رد مع اقتباس
قديم 22-08-2005, 11:15 AM   #58
Guest
 
المشاركات: n/a
افتراضي

الهمباتة
كيف أصبحتوا
جيت الله دغشاً بدري
لقيت البوست محيّن تب وخاتّي ختة سمحة
داير أرتع فيه بمزاج ... عشان كدا بقوم أنسخه وأطبعه
وأشيلو معاي البيت
وبي مزاااااج بعد فنجان جبنة بي شمالو يسوي الدنيا بي حالو
نشوف الفي البوست
لكن كدي هاكن دي من عمنا عبدالكريم ودشعيت يتغزل في محبوبته (جنة):
جنة سدرها شايل ليهو رمانات
جنة الفيها أوصاف السماح تامات
جنة العندها العز والخيول عارضات
جنة فطيمة المرقن على السبعات

درعا كفلها عالي ضميرا زي حجبات
(شبريك) فيه زي نقش الكتب بالذات
سمحة سماحة ما سمع بيها في السابقات
تاجوج والزبيدة زليخة في الشيخات

سيقان جنة روثمان قاطع العوجات
وأقدام جنة ليف، لا هن أفتكر لينات
عاشق جنة جنى بتعتري الحالات
نظرات جنة أنفع من دواء وبخرات

الكلمة بين القوسين غير متأكد منها .....
  رد مع اقتباس
قديم 22-08-2005, 01:19 PM   #59
Guest
 
المشاركات: n/a
افتراضي

بعد الكلام ما جاب الكرم :
أحكي لكم القصة دي... من عطبرة ... وأتبرا دي عندي ليها مودة خاصة ...
أذكر ذهبت لمناسبة في منزل الصديق احمد هاشم في حي المطار وكان مقطوع من البلد لفترة ثمانية سنوات في الدراسة بالهند... فعند وصولي وأخذ ورد مع الشباب بقيت أنا وهو حالتنا واحدة ... يعني الشباب العرفتهم ... بقيت أعرفهم أكتر منه هو ... بقوا الضيوف يجوهم من الشمالية ... والخرطوم والدامر ... أنا بقيت بدون ما أشعر ... أمسك في الضيوف ديل وأمشي أفتح أقرب باب ... وأفتح الصالون وأفرّشو... وأقعّد الجماعة ويرتاحوا .. بعد شوية يجوني ناس البيت ولأول مرة أشوفهم ... يجوني بالشاي والعصاير ... وما عارفين أنا منو ولا عارفين الناس ديل من وين... لكنهم عارفين إنو ديل ضيوف جيرانهم ناس أحمد هاشم... أمشي أخش أي بيت وأقابل الفيهم كان رجال كان نسوان تب ما يقصروا معاك ... والله ما لقيت لي زول قالي إنت منو وجاي من وين ولي شنو .... في النهاية أهل المناسبة بقوا يقولوا لي: أمشي ديك ضيوف جو... أمش جيّههم... والله رأسي ما انقطع تب وعيني قوية بقيت أمشي أي بيت... وأنزل ضيوفي وأخليهم هناك .... بعد شوية الضيوف ديل زاتهم بجيهم راجع بلقاهم صاحبو ناس البيت وبقوا ناس بيت تب....
يا أخي والله أنا كرم وطيبة زي دي ما شفتها، وبعدين منو البفتح بيتو لي زول غريب ويشوفوهو أول مرة غير الجماعة ديل ... وحسن النية والثقة في الناس تلقاها عند أول زول تقابله ...
والقصة التانية المناقضة ... في جدة ... دخلت مكتب سفريات بعدما شفتهم يصلوا عبر الزجاج وقلت ألحق المغرب معاهم ... لاحظ مكتب فاضي ما فيهو شيء طربيزة بس... فيه ناس قاعدين في سجادة عشان يصلوا ... دخلت قلت أصلي معاهم ... جاني واحد طاير يقول: إيش تبغى ... وبعدائية غريبة ... قلت ليه شن حارسو شن خايف علي .. داير أصلي بس... يعني داير أفجّركم ... ووجم لحظة وسكت بخجل....
يا أخونا حاتم منو والطائي منو!!! والله أنا أشك في كل التراث العربي عن الكرم... إما إنو مافي حاتم أصلاً ... أو هو ما كريم للدرجة السمعناها دي ... أو الناس ديل ما ليهم علاقة بي حاتم الطائي الكريم داك .... واحد في التلاتة خيارات دي شوفوها لي... لكن بيني وبينكم حاتم الطائي دا يكون مولود في عطبرة...
بلادي أنا بلاد ناساً يكرموا الضيف
وحتى الطير يجيها جيعان
من أطراف تقيها شبع
  رد مع اقتباس
قديم 22-08-2005, 01:46 PM   #60
Guest
 
المشاركات: n/a
افتراضي

الهمباتي الله يديك العافية
ولاا كسر الله قلماً ولا فصل كيبورد

فز بالكاس برنجى مخلى زيطك ضارب
عطبراوي
حلات القمره فى الحله وليالى الصيف ..
حلات النيل وقت يطمح يقالد القيف ..
حلات ريحه الدعاش والمطر هتِّيف ..
وشاى الرايقه يا حليلو البتم الكيف ..
ومرة أخرى تحياتي للجميعابي
وحلات بلدي

فوجي ... حبابك ألف
بِت السرْعَـفَن قَـدَّن صباح من بيلا
فوكّا بْهيطِل الـنُّـمّـيل وسابقا السيلة
ضِيرْها مْسَنِّدات فوق الضهور دار ليلة
بـ سَهَلاَ بَهيل باكِر نَوَنْ بها ميلة
الرمية دي دايرا لها شوية شرح
السرعفن :
بهيطل النميل:
ضيرها:
ولك الود والترحاب
بيان حبابك في خيمتنا
وطعمتي القعدة
واصلي وما تقيفي ونحن حضور وكلنا آذان صاغية
  رد مع اقتباس
قديم 22-08-2005, 04:20 PM   #61
عطـــبراوى
رحمة الله عليك أبا روان
 
الصورة الرمزية عطـــبراوى
 
تاريخ التسجيل: May 2005
الدولة: في رحاب الله رحمة الله عليه
المشاركات: 3,014
افتراضي

بدر الدين أخوى رسالة واحدة فى الخاص نضع النقط فوق الحروف . واشوفك
جيت حى المطار وين وياتو مربع ؟ يازول انت ما وصلت تب .
هاك النمات ديل عشان خاطرك ..

قال محمد عمر دكين ..
يا حامد بشوف بلد الهجيس اتقسى ..
النوم أبعدو التيلادو خاتى النسَّه ..
من فرق أم حشا الجمع الكبار مجلسَّا ..
صارت أم برد علىَّ كل مره تأخد عسَّه ..
بت المن زوالات اللنس قوسها ..
ختمت ود كوى عارقه السليم حسسها ..
أنا يا مولاى قلبى أنقص ..
من فرقات فلو الشايقى الموارك الرصه ..

ويرد عليه الجميعابى ..
إت مالك در تجيب لى حسَّه ..
قلبى بعد هجس سويت له خزه وحسَّه ..
بوصف الجدى الفى صديرو ما ضاق مسَّه ..
ما قاربها شئ غير النسيم لامسها ..
ويقول ود دكين ..
الليلة البعيده جنانى متذكرها ..
أخير نمضغ صبرنا ونفسنا نكهكرها ..
الدرعاء اللسانى مؤدب وبيشكرها ..
أمسى ينقط الدم منة ضميرى عقرها ..
ويرد الجميعابى ..
رايقه حشيمه سمحه أديبه راقى فكرها ..
وكت أطراها بسمع فى قليبى نقرها ..
تقل أردافها دايماً فى المشى مسكرها ..
ده الخلا الكباد رمه وبزازى صقرها ..

وتسلموا ..
__________________
----------------------------------------

الفرق بين العصيدة والمديدة قبضة دقيق
عطـــبراوى غير متواجد حالياً   رد مع اقتباس
قديم 22-08-2005, 07:50 PM   #62
Guest
 
المشاركات: n/a
افتراضي

عطبراوي ...
ياخي والله أنا أول مرة أسمع بي دكين دا...
والجميعابي سمعت بيه منك إنت...
ناس زي ديل حرام يكونوا بهذا الغموض والناس تمر عليهم
بدون تعليق
وأقول لك بصراحة
شعرهم ربما يكون أفضل من كثير من شعر الدوبيت والمسادير
التي وصلتنا من شعراء البطانة وغيرهم
يعني اليوم في شعراء بجوّدوا الشعر على أصوله
لكن الناس قافلة على شعراء معينين في مسألة شعر
البطانة والشعر الشعبي عموماً....
بس الناس ديل خليهم ينشطوا شوية
ويراسلوا الجرايد والمجلات وما أظن في زول بتذوق الشعر
بيصدهم ... على الأقل الناس تعرفهم ...
ونحن من هنا .. النت دي بنملاها تب بي شعرهم ونماتهم
حرّم علا نخلي علالّتا رابطة ...
  رد مع اقتباس
قديم 23-08-2005, 08:55 AM   #63
عطـــبراوى
رحمة الله عليك أبا روان
 
الصورة الرمزية عطـــبراوى
 
تاريخ التسجيل: May 2005
الدولة: في رحاب الله رحمة الله عليه
المشاركات: 3,014
افتراضي

بدر الدين وبقيه الهمباته ..
صباحكم مفرهد زى رقابة اللوبيا فوق القيف..
الشاعر محمد عمر دكين من الصفيه بالبطانه ، وأنا زاتى
أول مره القى ليه شعر ..
أما أخونا هاشم فهو من الجيلى جمعتنا به الظروف فى الغربة
فوجدته فى كل مناسبة يقول شعرا ويحب الرباعيات ، لذلك قمت
بجمع ما كتب من قبل وطبعت له مجموعة وهى معه بالسودان .
ومن يوم ما سافر لما نحن له بنرسل له مسدار ويقوم يرد عليه
بالموبايل ونحن نجمع . شفت التكنلوجيا دى ؟
هاكم المسدار ده صاحبه منو ما عارفه ، لكن يخيل الى أنه الحاردلو .

لخلوخة تقوم مِسليسه ومفروقه ..
بين التقنتين دفق البصير ماروقه ..
إن جلست معاك وإنْ سِمع منطوقها ..
على المتشببَّات بلحيل بعيد معلوقه ..

ويقول أيضا ..
بت اليازمان قبل الرخيم تتاقه ..
فيها خمس حزوز ، شورتين عُقب خنَّاقه ..
تلَّت وبكَّت الخوخ النقرتو دقاقه ..
فوته على البنات تمرة لسان وحداقه ..

وتسلموا ..
__________________
----------------------------------------

الفرق بين العصيدة والمديدة قبضة دقيق
عطـــبراوى غير متواجد حالياً   رد مع اقتباس
قديم 23-08-2005, 12:30 PM   #64
Guest
 
المشاركات: n/a
افتراضي

الهمباتة
كيف أصبحتو
أها أسمعوا جنس الكلام دا :

ظهرن فيّ ها الأيام جروحا جداد
بتكدر وأنوح والنوم علي ما عاد
من فرق أم دغسة خلقة مو مرواد
معشوق ليلى أخير ما لاي ضاقلو رقاد
الحردلو

بريد الجرحو من سقط الفواصل خاز
بريد الفي طلق نار القمير والجاز
بريد القامتو مربوعة وبراطمو لذاذ
بريدو وأصلو عاجبني الدروبو عزاز
الصادق ود آمنة

  رد مع اقتباس
قديم 23-08-2005, 05:31 PM   #65
عطـــبراوى
رحمة الله عليك أبا روان
 
الصورة الرمزية عطـــبراوى
 
تاريخ التسجيل: May 2005
الدولة: في رحاب الله رحمة الله عليه
المشاركات: 3,014
افتراضي

سلام عليكم ..
الحاردلو ده عنده شعر عجيب . وقد ولد فى البطانه عام
1830 وتوفى فى ريره 1916 عليه رحمة الله . وقد
عايش فترة المهدية وله فيها حكايات وقد سجنه الخليفة عبدالله
فترة من الزمن .وولده عبد الاله الحاردلو يذكر أنه قدم شاهدا فى قضية فسأله
الأمباشى فى المركز عن اسمه فرد عليه عبد الاله الحاردلو ولكن الأمباشى لم
يعرف الحاردلو . فأستغرب الولد وأستغرب الناس على جهل الأمباشى .
ركب الحاردلو أحسن الجمال وأكل الطيب حتى مله وله خادمة تسمى ضوه ،فقد
كان زعيم عموم قبايل نهر عطبره وكان مطاع الأمر ...
يقول بعد ذاك العز ..
حت عبد الله شاف الحال علينا ضعيفة ..
ما قال ضوَّه خلت فى عقابها خليفه ..
الضايقين لِماها قالوا إن حلفونا حليفه ..
حِلوه ولينه يدفى جِليدها من الزيفه ..


نهدا دق تيل ماهو المدوشش قِرِّو ..
يلعب حَرْدَفى تو المِراقد تِرُّو ..
فى بوش العصير الناس يقوموا يبِرُّو ..
فوق ندداها كُرباج النصُر بِتوِرُّو ..
__________________
----------------------------------------

الفرق بين العصيدة والمديدة قبضة دقيق
عطـــبراوى غير متواجد حالياً   رد مع اقتباس
قديم 23-08-2005, 09:45 PM   #66
Guest
 
المشاركات: n/a
افتراضي


وضّح يا عطبراوي :
نهدا دق تيل ماهو المدوشش قِرِّو ..
يلعب حَرْدَفى تو المِراقد تِرُّو ..

فيها شوية تعقيد ...
ولك التحية
  رد مع اقتباس
قديم 24-08-2005, 12:18 AM   #67
alhmbati
Guest
 
المشاركات: n/a
افتراضي

الضايقين لِماها قالوا إن حلفونا حليفه ..
حِلوه ولينه يدفى جِليدها من الزيفه ..

دا الشغل المميز هو
  رد مع اقتباس
قديم 24-08-2005, 12:28 AM   #68
alhmbati
Guest
 
المشاركات: n/a
افتراضي


الليلة العيون من المنام لاجات
ونيران الصنوبر فى الضلع واجات
على متبور القديم الزند العاجات
صبح قلبى رغوة يتبع الموجات
  رد مع اقتباس
قديم 24-08-2005, 01:31 AM   #69
ود مسمار
 
الصورة الرمزية ود مسمار
 
تاريخ التسجيل: Aug 2005
المشاركات: 2,926
افتراضي

سلام سلام سلام

بدر الدين - الهمباتي - العطبراوي - فوجي - بيان - البحيراوي

يا رباعة والله كل بيت دايرلوا وقفة... انا في راي نخف اللعب شوية .. ونحاول نشوف الجماليات الموجودة في هذا النظم ..

يعني مثلا نجيب مسدار ونترك للجميع ان يدلي بدلوه .. بشرح ما استعصي من كلمات .. وكذلك بيان الصور الجمالية التي يتضمنها ا المسدار . وهكذا
ده مجرد راي
ود مسمار غير متواجد حالياً   رد مع اقتباس
قديم 24-08-2005, 10:51 AM   #70
Guest
 
المشاركات: n/a
افتراضي

الهمباتة
كيف أصبحتو!!
علكم عافية
ود مسمار كلامك سمح تب آزول
أثني وأبارك
  رد مع اقتباس
قديم 24-08-2005, 12:35 PM   #71
عطـــبراوى
رحمة الله عليك أبا روان
 
الصورة الرمزية عطـــبراوى
 
تاريخ التسجيل: May 2005
الدولة: في رحاب الله رحمة الله عليه
المشاركات: 3,014
افتراضي

صباحكم صباح تبسا مندى مع دعاش الصباح .
ودمسمار كلامك فى محلو ومفروض ما نمر مرور الكرام على الرباعيات
دى ، وأنا برجع تانى فوق شويه ونبدأمن الليلة . لكن بعد مرات
الناس ديل هم زاتهم عندهم كلام لا فى معجم لا فى كتب ونحن زاتنا
ما بنقدر عليه . لكن الكلام كجملة مفهوم فى بعض الأحيان .
نرجع لبدر الدين وأقول لك ..


وضّح يا عطبراوي :
نهدا دق تيل ماهو المدوشش قِرِّو ..
يلعب حَرْدَفى تو المِراقد تِرُّو

أقول وخير القول ما انعقد بالصواب . أن البيت فيه خطأ فى الطباعة
ويمكن أن يكون لجهلى باللغة أو لعطلِ فى الكى بورد ..
المربوع مفروض يكون كالآتى ..


نهدا دق تبيد ماهو المدوشش قِرِّو ..
يلعب حَرْدَفى تو المِراقد تِرُّو ..
فى بوش العصير الناس يقوموا يبِرُّو ..
فوق ندداها كُرباج النصُر بِتوِرُّو ..
__________________
----------------------------------------

الفرق بين العصيدة والمديدة قبضة دقيق
عطـــبراوى غير متواجد حالياً   رد مع اقتباس
قديم 24-08-2005, 12:54 PM   #72
عطـــبراوى
رحمة الله عليك أبا روان
 
الصورة الرمزية عطـــبراوى
 
تاريخ التسجيل: May 2005
الدولة: في رحاب الله رحمة الله عليه
المشاركات: 3,014
افتراضي

أها يريد أن يقول أن نهد هذه الحسناء كالبرتقالة صامدا . وود تبيد
هذا هم صاغة مشهورين وأصلهم من شندى على ما أعتقد ، فهم يجيدون
فن الصاغة لذلك شبه الشاعر ذلك النهد بدق ود تبيد للجودة وماهو المدوشش قرو
يقصد أن ذلك النهد واقفا صلبا وليس منفوخا ولينا . (شوف الكلام ده كيف ) . وقد
ذكر الكتور ود بادى فى قصيدة حوه وقال ( وعاجك فضة من دق ود تبيد الغالى ) .
أما الحردفى فهى لعبة بنات قديما وفيها تقفز البنت وتنطط . لذلك يقفز معها ويهتز ذلك النهد كأنما يلعب الحردفى هو أيضا . أما باقى البيت لا أعلمه .
أما بوش العصير هو لمه الناس ودائما الناس بتتلم فى المناسبات بالعصر .
وهنا أن هذه الحسناء عندما يجتمع هذا الجمع ساعة العصرية وكل الناس تحضر .
تقوم هذه الحسناء وبفخر تعتز على أندادها وتجذب كرباج النصر فى الهواء حيث يصدر صوتا قويا وتكون هى ست الكل فى ذلك الموقف المهيب ..
أما الكرباج فهو ليس السوط . فالكرباج طويل ويجذب فى الهواء ويصدر صوتا
ويمكن تكونوا شفتوه عند رعاة البقر عندما يسوقون الخيل والأبقار أمامهم .
وهناك حبل يفتل كهذا الكرباج وأيضا يستخدم لطرد الطيور من الزراعة ، فيحمله شخص ووسط الزراعة يجذبه فتطير الطير مبتعدة . وهو ذو صوت عالى أيضا . ويسمى فى بلدى ( اللقاو ) . هل سمعتوا به ؟؟
__________________
----------------------------------------

الفرق بين العصيدة والمديدة قبضة دقيق
عطـــبراوى غير متواجد حالياً   رد مع اقتباس
قديم 24-08-2005, 01:02 PM   #73
Guest
 
المشاركات: n/a
افتراضي

شكراً
يا عطبراوي
وضح المقطع...
راجع اقتراح ود مسمار دا ...
وأدينا رأيك فيه
ولك التحية
  رد مع اقتباس
قديم 24-08-2005, 01:17 PM   #74
عطـــبراوى
رحمة الله عليك أبا روان
 
الصورة الرمزية عطـــبراوى
 
تاريخ التسجيل: May 2005
الدولة: في رحاب الله رحمة الله عليه
المشاركات: 3,014
افتراضي

وأخيرا ..
توضيح بسيط فوق مسدار الهمباتى أخوى ..


الليلة العيون من المنام لاجات
ونيران الصنوبر فى الضلع واجات
على متبور القديم الزند العاجات
صبح قلبى رغوة يتبع الموجات

لجج العيون معروف يعنى ما جايه نوم مساهر . ونيران الصنوبر يقصد أن
نار شجر الصنوبر وهو ذو نار قوية فى صدره وبين ضلعه متقدة ومتأججة .
وعلى متبور القديم الزنَّد العاجات .. الله الله على هذا الكلام .فمتبور القديم هى الساق
والرجل كلها تكون متساوية ومتبورة . وقد قال الناس زمان وإلى الآن ( الحله بصل
والمره كرعين ) . أها نوع الكرعين ديل . وقد قال عمرو بن كلثوم ..
وساريتى رخام أو بلنطٍ - وكشحاً قد جننت به جنونا ..
لما جيت أكتب البيت ده عندى صاحبى جنبى قال لى يعنى
كرعيها علب كبرى مصبوبة .. وهذه الأرجل مشدودة وقافلة على عاجها
والعاج هذا كانت تتزين به المرأة قديما .
والبيت الأخير شبه قلبه بالرغوة أى الزبد الذى يطفو على
الماء فيحمله الموج أنا شاء . وذلك كناية على هيامه بها وفقدانه لنفسه وعدم
السيطرة عليها ...
أرجو أن أكون قد وفقت فى الشرح وتوصيل المعلومة ..

وتسلموا ..



كرعيها علب كبرى مصبوبة .
__________________
----------------------------------------

الفرق بين العصيدة والمديدة قبضة دقيق
عطـــبراوى غير متواجد حالياً   رد مع اقتباس
قديم 24-08-2005, 01:34 PM   #75
Guest
 
المشاركات: n/a
افتراضي

يا عطبراوي
رسلت لك رسالة في الخاص
وصلتك ... أم لا ..؟
  رد مع اقتباس
إضافة رد

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع


الساعة الآن 05:36 PM


Powered by vBulletin® Version 3.8.7
Copyright ©2000 - 2014, vBulletin Solutions, Inc.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل الرأي الرسمي لصاحب الموقع أو سودانيز اوف لاين بل تمثل وجهة نظر كاتبها .