مركز تحميل الملفات



العودة   المنتديات > منتدى الأدب والشعر والنثر

« آخـــر الــمــواضــيــع »
         :: مقترح لإنشاء جمعية أهلية لحماية المستهلك (آخر رد :عابد البادنابى)       :: الحــــــــــــــــــــــــــــــــــوار (آخر رد :محاسن النور)       :: Natural Makeup (آخر رد :maccheaprbx)       :: نساؤنا (آخر رد :عابر طريق من بعيد)       :: شخصيتك . (آخر رد :محاسن النور)       :: or on top of the world (آخر رد :iccyak93dn)       :: القتل .! (آخر رد :ود الشيخ)       :: الدلكة دميرة هذا العام (آخر رد :ابراهيم محمد صالح)       :: لمسسسة حنان في برج الميزان (آخر رد :نادر ليمونه)       :: jترحيب (آخر رد :ابراهيم محمد صالح)      

إضافة رد
 
أدوات الموضوع انواع عرض الموضوع
قديم 22-09-2005, 01:59 PM   #26
Guest
 
المشاركات: n/a
افتراضي

جمعها العضو حليم حسن في سودان نت سنة 2001 باسم هدية

يا جرح عزة هوانا

يا جرح عزة هوانا الساكنة فى حرف الكتابة
اصلو فى زمن الاسى المشدود على وتر الكآبة
فى زمن الحرقة و الخوف والرتابة
انكضم نبض الاغاني وانبهم حس المعاني وانجرح خاطر المهابة
جيتيني فى الزمن الاليم
وقلبي مثخن بي جراحات الهوى
عمري ضائع فى متاهات النعيم
فى دروب الغربة لا تاب لا قوى
كان عيونك فيهن الوصف القديم
معنى في الحب انطوى
وضاع معاك زمن الوسامة
واختفى الفرح العلامة
لسه يا حزن الملامة
من سنين دربك سلامة

عينيك مدن

عينيك مدن منسية في كتب التواريخ و الزمن
عينيك وطن مشدود على وتر التباريح و الشجن
ممدود على حروف الكتابة مكدودعنا ومكتول صبابة
عينيك سفر مكتوب اعيش فى غربته
واعشق عذابه وحرقته وليله الطويل
واتخيلك يا حلوه زي نسمة سحر
جيتي ومعاك حلمي المطول منتظر وعده الجميل
عشقك زمان جواي رحل واتناه فى الاعماق امل
ضمخ رؤاي احساس نبيل اذهل طيوف خاطري القبيل
جاشت ملامح روعته ضج السكون في وحشته
و الكان امل فى عيونه لاح ذوب مدارات فرحه الوهج لنضير
و المزدهر بالارتياح
فجاة انحصد قبضة رياح وسكت الكلام يا حلوه فى القول المباح
وغاب الصباح بعدك رحل والكان امل في غيم سماك
ايقنت انو عدم بلاك وانك قدر
وانه البحلم بى علاك بختار ظروف احلاها مر
عينيك لو تصدق معاي الامنية عينيك لواعرف ختام الاغنية
بدء الكلام والمنتهى و المستطاب و المشتهى
كل المباهج فى المواويل و الغناء
و العاشقين قلبي وانا هزتنا فى عينيك تصاوير المنى
يا امنيات من كم سنة
يا اغنيات كل الاماسى المستحيلة وممكنه
يا المستحيل عينيك تهون و المستحيل قلبك يخون
ما الغدر ما طبع الوفى والصدق ما شرط انتفى
وانا حالى من بعدك كفى
وانا حالى فى بعدك كفاه المغنى والحب و الشجن
و الوحشة والشوق للوطن ما العمر قبلك ضاع سدى
و العمر بعدك ايه يكون لو يبقى بحساب الزمن


كتبت ليك

كتبت ليك لا بيني بينك ريد لا قصة غرام
اخترت ليك اجمل حروف واصدق فواصل نادرة فى لغة الكلام
لا قصدي الهو معاك بى كلمات غناء
لا شعرى ليك مرجيحه من شعر الغمام
وكتبت ليك
و الله يا قمر الزمان عشان جيتي بى زمن المحنة
وشفت فى عينيك حس اهلى القدام
وكتبت ليك
وانا جاي من زمن الشقا المرسوم على وش الثواني مظلله
تتمدد الساعات سنين تتفتح الخزان غريبه ومذهله
واشتاق افتش نسمة فى الزمن العذاب
وايامي من كتر الاسى وكتر العزوف و الاغتراب
صارت حروف مترهلة لا فيها نبضت روح تموت
لا فيها سكة زول يفوت لحظات اسيفه ومهملة
وكتبت ليك
ووقفت ليك لامن لقيتك جايه من قلب الطريق
ولمحت فيك راحة المشاوير البعيده
ولفحة النسمة الحنينة الجايه من جوف المضيق
حسيت عجائب الدنيا اتلمت بقت جاياني من عصرا سحيق
عينيك حس اطفال بنادوا القمرا للغائب يعود
وجبينك الضواى حجا الحبوبة فى الزمن السعيد
وانا فى قساوة الزمن الموحش الزمن المكهرب بالحريق
انا حيلتي ايه قولى يا قمر الزمان
غير اتكى واحلم معاك
واحضن اماسى الصحوة والامل البريق

عدى فات

عدى فات زمن العيون الالفة و الحضن الملاذ
ورهافة الحس البلون ضحكة الناس العزاز
بعد الحنان الكان زمان استوطن المطر الحراز
روح زماني وفى رجاك عانيت قساوة الانتظار
في ضل شبابيك السفر صادقت ليلات المواني
الساكنة في بحر الاماسى بتنتظر لو يوم طيوف لحظك ...ت
تعبر خيالاتك تمر قلق المواعيد الضجر
سهر العيون الاحتراز وتعزز النوم الخزاز
وتمدد الشقى فى العمر مليت تباريح الجراحات البقت بعدك اسىوزمنا قسى وحالا اسيف
ومشيت افتش عن خطاويك القبيل
وضارىمن زمن وراك ملني خوف
احتجت ارتاح فى عيون فيهن ملامحك ذاتا من غير اي زيف
واشتقت لى ضحكة صباحك و الدعاش عطر رزاز مطر خريف
وانا وانتى الدنيا الامان والناس وفا وخوه وصفا
ودفء المشاعر الشاتيه صيف انا انتى والدنيا الامان
زمن الغناوي الطالعة من قلبا رضى وحسا ندى وزوقا رهيف
انا و انت والدنيا الامان ما العمر شتان بين اوان زمنا حييتو
وعمر ما بتقدر بتعرف بكره يصبح حاله كيف
عدى فات

بقيت أغني عليك

وبقيت اغني عليك غناوي الحسرة والاسف الطويل
وعشان اجيب ليك الفرح رضيان مشيت للمستحيل
ومعاك فى اخر المدى فتيني يا هجعة مواعيدي القبيل
بعتيني لى حضن الاسى وسبتيني للحزن النبيل
ومشيت معاك كل الخطاوي الممكنة وبقدر عليها وبعرفه
اوف وما قصرت في حقك ولا كان عرفة غيرك اصادفه
وقدر هواك يجيبني ليك جمع قلوبنا و ولفه
وك بقيتي معاي فى اعماقى فى اعماق مشاعري المرهفة
لا منك ابتدت الظروف ولا بيك انتهت الاماني المتطرفه
ندن ابدا وحاتك عمري ما شلت الندم
ما اصله حال الدنيا تسرق منيه فى لحظة عشم
رم اتملساك يا جرح الالم
كان خوفى منك جاي من لهفة خطاك على المواعيد الوهم
او نحا فى ااخر سوا باعنا الهوى وماشين على سكة عدم

يا ضلنا

يا ضلنا المرسوم على رمل المسافة وشاكي من طول الطريق
قول للبنيه الخائفة من نار الحروف تحرق بيوتات الفريق
قول ليها ما تتخوفي دي النسمة بتجيب الامل والامل بصبح رفيق
و الاصله في الجوف اندفن لا بتنسي لا بنمحي لا بنتهي منه الحريق
و الفينا من اهات اليمه فى حكاوينا القديمة
لا بيرحل عن عيونا ولا بتغشاه الهزيمة
و القبيل راجينو نحنا يوم تبشر بيه غيمة
لما تمطر يوم علينا الفرح يملا المدينة و البلودات الحزينة
يا ضلنا

مساماتك بتتشقق
عشان تشرق صباحاتك
صباحاتك بتتعانق مع الفكرة
وتاخذ من جراحاتك
نضيف احساسنا لى بكرة
يا بكرة .... يا بكرة
يا بكرة الغصن ناشف
يا بكرة الفرح يوماتي
بيكاتل حزن اطفال
بتتشابا عشان تعرف
شنو الفى ايدينا لى بكره
شنو الداخرنو للسكة
عشان تشرق صباحاتك
عشان تقصر مسافاتك
عشان تبرق غماماتك
عشان تخضر مساحاتك
عشان بكرة وبعد بكره

ما معنى

ما معنى ان نحيا ولا ندري بان العشق قد يبقى سجينا فى الخلايا
ما معنى ان نشهد موات الاغنيات ؟
ما معنى هذا الصمت الذى لا ينتهى وبرغم حاجتنا الصراخ ؟
هل يختفى الظل الذى لا ينتمى الا لمعى وجهلى
وهل نودع بعضنا بعض ونذهب فى سراب الذكريات؟
كيف تبدو الذكريات؟
كيف يبدو طعم ايام الشجن
من يعلم ذكرياتي كل اشكال التداعي
و الرحيل المر دوما
حين يصتدم المدى بالماسى
و المخاوف واحتضار الامنيات
تعب هو البرق الذى لا يضئ اقبية الخبايا
لا ينتمي للسحب و العشب الذى لا يرتوي الا لطعمك
يا عصيرا من خليط الدهشة الاولى
واحترافى الاغنيات

خبريني والمساء الشاحب الخطوات يحترف التعب
ورحيل اغنية توشوش في خبايا الانتظار
تضيع مني
كي اجاذب كل اطراف الزمان اهدهد الكلمات
لا اقوى على شئ من الذكرى وهذا العقل متعب
وجوع الدرب لا يفضى اليك و لا الى اللغة الصريحة
كي احدد ما تبقى من رحيقك فى مسام الروح و الجسد اشتعالا
وهذا النبض اتعب وتلك الخطوة ابتعدت
عن الصحو المكمل للحقيقة
اغلقت بالخبث ابواب الوضوح زيفت صوت المغنى
عهرت لغة النشيد ضيعت حلم الصبايا
فى طوابير الرغيف غيبت حلم الطفولة
انهكت حزن الشيوخ همشت منك القضايا فى احتمالك للتواصل
و المرابون استباخوا هذه الارض الحلوب
فيا جميلة خبريني كيف بدلنا الكذوب فى انتظارك بالكذوب
ثم انا لم نعد ندري بانا قد حملناك جنينا
قد نسينا ان نضع فيه الملامح
لا سئلنا كيف ضيعنا انبهارك بالخصوبة
وارتضينا ان نسلم للعساكر
من ثمارك ما يطيب

طعنا الضل وفى الاحلام طعنا الفيل
قوافل الغضبة كانت طرحت تلات مرات
دحين جربته عضة زول ملان مغصه
حبالنا الجوه ما تخنت حبال السماء المسدود
حبال الصوت وكت يرجع يجيب الخاطر المردود
تعالى نشوف
غنواتنا البقت فى الدنيا ما بتشوف
تعالى نشوف حروف البكاء الجواها ما فى حروف
تعالى نشوف تعالى نطوف على المدن البقت اشباح
على الجوع القعد مرتاح
على الكلمة البقت فى الجوف نفتش سكة الافراح
تعالى نشوف منو البقدر يخاصم طفلة
صبحت هازلة فوق مد الاماسى الحراق
يا غنواتنا ما ...تي يا كلماتنا ما تموتي
فتشي فوق ضمير الكلمة
وعن وترا رحل فراق وعن بلدا رحل فراق
وعن ولدا رحل فراق وعن علما رحل فراق
غنانا الفينا ما بشفع حديثنا الجوه ما بنفع
تعالى نشوف تعالى نطوف
تعالى نعلم الشفع
تعالى نعلم اليفع

لا زمان حبك حقيقة لا تعب زمنك فرح
لا دغش وترك صدح لا بعد ليلك صبح
يا خطوتك
يا خطوة الوجع الجرح لا الفيها منك ابتدي
لا البيها منك انتهى
يا خطوتك
يا خطوة ضاعت بين صراخك والصدى
بين المشاوير والنوى
بينك وبين كل المشاعر الفينا غرقت فى الغناء
يا خطوتك
داست على الحروف اليبس فوق الشفاه
داست على البوح و الكلام داست عليك
وعلى انتظارك والملام
داست عليك
وعلى الدروب الماشة منك وجايا ليك
لا تعب فيها الحروف
لا فتر فيها الولف
يا خطوتك بين ابتعادك وانتظاري
بين مشاوير طفلة ضاعت
يا عيونك وافتكاري

الصباح الباهي لونك وضاحة يا فجر المشارق
غابة الابنوس عيونك يا بنية من خبز الفنادك
شيدتى في جواي صوامع للفرح وفتحت فى دنياي مسارح للمرح
وبقيتي لي سكة وعيون لا قدرت اطولك عشان اجيك لا قدرت من غيرك اكون
انا بيك ماليني الكلام حركت بيك عصب السكون
جلبت ليك الغيم رحط وطرزت ليك النيل زفاف
حرقت ليك الشوق بخور وفرشت ليك الريد لحاف
لا السكة بيك بتنتهي ولا معاك مليت طواف
ي ريتني لو اقدر اكونك وضاحة يا فجر المشارق
يا بنية من خبز الفنادك
غابة الابنوس عيونك

من الواسوق ابت تطلع .. من الابرول ابت تطلع
من الاقلام ابت تطلع ... من المدفع طلع خازوق
خوازيق البلد زادت
يفيض النيل ونحيض نحنا يظل حال البلد واقف
تقع محنة
ولا النيل القديم ياهو ولا يا انا
نعاين فى الجروف تنهد ولا يا انا
رقاب تمر الجدود تنقص ولا يا انا
متين ايد الغبش تتمد لاقدام لاقدام
تفش عين الظلام بالضوء تفرهد شتلة لا هدام
ولا فيضا يفوت الحد
عقب يا نيل تكون ياكا ونكون اهل البلد بالجد
يا مطر عز الحريق.. يا مصابيح الطريق
يا المراكبية البتجبد من فك الموج الغريق
جينا ليك والشوق دفرنا .. يا نشوق روحنا ودمرنا
يا المحطات الحنينة القصرت مشوار سفرنا
ياما شايلك فينى حائم لا الليالي المخملية لا العمارات السوامق تمحى من عيني ملامحك
انت جاية المغربية داقسة دايشة المغربية
وشك المكبوت مكندك سمسونايتك زمزمية
كون شبر طورية منجل ...سبحة فانوسا مدردح
قلتى بيه لى زمانك يا زمان الحاجة عندك
يا زمان الاها حدك لا تطا الوردة الصبية

سنى على النضال ايدي ..سوكى بالهتاف فمي
شوارعك لي دويها على اذا ما اخر العلاج الكي
مراويدك حمر حمي
هردت لهاتى بالغنوات وكت يبرد حشاك يمي
من التعب البلاء صالح تقيفي تروقى تنجمي
تسوى مكانسك المطره تضوى البيت وتنجمى
تمرقي صبوحة للجيران ح فوق ايد وفوق ايد المي
يلاقوك شفع الكتاب نضاف وظراف بلا النسمى
يغنولك غناوي الساب وفى بيوضه مافى سراب
جبال كجبي وفيافى الكاب تميد الخضرة منقسمي
فيافى الصي وبيوضه البراسيم فيها مفروضة
خدارا يراري شوف عيني على الابواب
قماريها طواريها وحواريها بقت روضة
بقت تشرب من الحامداب تشوفى رهاب بعد نجمي
واشوفو قريب قرب نضمي
اشوف العالم التحتانى هيلا هوب وقف ناهض
وهد عمائد الفوقاني جوه الجب رمى العارض
وفى السابو الدمار افراق عريق الحب نبض قابض
متل قبض الحروف فىاسمي وغناوينا القبيل رقراق
علينا تصب برد قارص
واجري نمي وادودي لهاتى بالغنوات
عقب يبرد حشاك يمي
وطنى ولا ملى بطني سكاتى ولا الكلام الني
بليلتي ولا ضبائح طي قليلتي ولا كتر سمى
سلام يمى سلام لا هكمى لا دكمي

ما طال فى بحرك فى مي وتمرك مفدع بالجريد
شدرك امد حد السمي طينك معتق بالطمي
نبنيك اكيد نبنيك هوا نبنيك ايو سوا سوا
منو جديد
يا ايد ابوي على ايد اخوي على ايدي انا
على ايد وايد تجدع بعيد فى اللجة من راس ميضنة
حيكومة الفقر الدمار الكضبن والصهينة
واللى نقاص ايامنا كاس
اليالطيف سوس البحر نرجم قفاهو حجر حجر
من ها الرصيف الما قدر قدام سريحة الموج يقيف
الما انستر
الارزقية وناس مو يا نسقيها كاس اسقتنا يا
نوريها كيف عشق الحياة
سنانا فوق حجر القصاص سوانا ناس ضرب البحر
جوانا احر من الرصاص
يا ضوء حبيبنا القسى طول ما انت غرقان فى الاسى
تبت يدين ما ترمي ساس ماتبني مجدك من جديد
تفتح شبابيك الخلاص تدخل نسيمات النشيد
بيت القصيد يستقبلا مستقبلا والحاضر الماضى التليد
يا بلدى يا فردة جناحى التاني وكت الناس تطير لى عالمه
وا وجعة الزول البجيك ما يلقى فيك غير الهجير
ناسا تواتي مسالمة
كل البشاشات الكانت قبيل يلقاها ميته مسممة
والجاتا جاتا من الارض ما جاتا من تالا السماء
ما اعتى غبنك يا ولد واعدل قضيتك واعظما
لا ترجع السيف الجفير والدنيا فايره مصادمه
من غير تجيب تار البلد ريح العوارض تهزما
وتطرد مع ابليس الاخير دعة الضلال من جنتك يا ادما
تاكل من الشدر الحلال يغشاك نعاس فى ضل رمى
تختاك هضاريب الصعب كربة ليالي المظلمة
يا نيل قبل خاطرك يطيب ارضك تفزع باللهيب
تكشح تواريب الغضب صعب المراس
نوبة وزنوج وبجه وحلب رطانه عربان مو اشو
مولدين تلقانا او نلقاك ضوء
ضلمة لياليك العجاف رشة نهاراتنا العجاف
آمنا بيك وموحدين فى ايدنا فاس وقلم رصاص
شتلة وكمنجة ومسطرين وطبنجة فى خط التماس
حراسة من كيد البكيد ضد الرصاص والانتكاس
نبنيك جديد واشد باس

الشوق من حاصف لا قاصف اتلم يهز ليك يا نواراي
يا درقة وسيف يا حصنا كيف
من شر الصيف والشتاء ضاري يا شملة عز بقت جواي
عدت بى ضلام بحرا عاصف
يا بت العرب النوبية .. يا بت النوبة العربية بى شملة نخوة بجاوية
او شجرة الصحوة الزنجية دسينى من الزمن الفارغ
من ريح المتعة الوقتية
من الساحق والماحق بين دبش المدن المدعية
والليل اتحكر بيناتنا كحل بيى ديشو عويناتنا
يا شمس الناس المسبيه الجوع العطش .. الغد واحد
الفقر الضارب زي سوسة الخوف والحالة المنحوسة
يا بحر احاصل لاك ناشف لا قلمي الفى ايدي عصا موسى
الناس عوجات تحرس ترجى ترجعبوا سلاح وانور زينة
بنبان تواليت افات وسكى للناس الدمنا بنزينها
فقرا تسترزق من دينها
يا بت الناس الصالحين الذمم المشرية الطالحة
شتان بين دينك وبين دينها
يا نورة شليلك ما فات بى عدلو شليلك جاييك
جاييك يتزود من غلبك القمر الطيب يفضحنى
تنبحنى سجونك واهاتها
كنا سجونك لو لاك
منعول الزمن الخلاك
سلمتى الوطن الهمباتة
على كيفك كيفك يتحكم
يا سوس تكنك ما بتعلم
بى حال البتالم وساكت
يا حال الساكت وبتالم
بتفتق جراحك وتبرا
تتلم وقيدك يتحطم
وين عادك هاربة من بكره
وخطو التاريخ البتقدم
رغما عنت الايام
والزمن الجهجاه الفاجع
بى النفس النازل وطالع
ولا واحد من شعبى مضارع
سميت ومشيت وما متراجع
ترتالاها تكوسلها فى الجية

نشوة ريد احساس اكليل
وردة وصلك جنة اصلك نجم الليل الوصل جميل
نحنا مشينا الخطوة الاولى وانت معاي مشوارنا بيقصر
بكره بنحكي الشوق للذكرى نار الريد الغابت تظهر
الاطفال يا فاطمة بغنو الافراح لابد من ترجع
الاطفال يا بنيه بغنو الافراخ لابد من ترجع
الاحلام الدونك فاتت لو واصلنا صباحا بيطلع
نشوة ريد احساس اكليل
وردة وصلك
جنة اصلك

ليه غبتي يا قمرا
نركب جياد الليل
ينشر بينا صباح
سفر العتامير ليل
نرجاك فى المطره
ارجع تعال يا شليل
درع الاميره سرق
سووه حدوة خيل
بحر العطاشا نشف
نشرب بواقى السيل
صد لى ملامحك يا حراز
ريح العوارض غربت
فرتق ضفايرك فى الرزاز
جية العصافير قربت

كيف اجاوب عن هوانا لما يغلبني السؤال
لما يتارجح منانا بين مظنة واحتمال
ما بحسك
دونك انت الحقائق فى الظلال
و الحرف بعرف مداه حتى لو جن الخيال
ادفقى
ابقي يا ضل يا شموس
غطى المساحات بالوضوح
استنهضى الشوق الجلوس
ادفقى
وهجك شوارع ذاتي فى ليل الضباب
ما تخافى من دم الغروب
لو رتش اللوحة الضباب
ما دام ضمير الفينا حي
ما دام عريق العشق حي
ملحوقة يا مدن السراب
ما تشفقى
العطش الرحيل
النيل ركيزه
ودمعة الاحباب سحاب

القاك وين
القاك وين كان الفرح قفل مسامات الضياع
غناك مزمار الزمن ارشيف عشق واصوات نغم
وتر التراخي موشحات نلقاك وين
من غبتي ما شرقت شمس
و الدهشة ساساق الدروب لى وين تمش
نار النضال لو تنهبش توقد سنون المتعبين
تعقد زفاف آخر ضمير اتباع مقنن بالقرش
نلقاك وين كان التعب ما خت ايده
على جبين تربال يخم رمال الشقا المليان غلب
دقست قوافلو مع السراب
رابط جريد الهم سعن
محزوم خشيمه من الصبر راجي السحاب
القاك وين ونلقاك وين
انا وانت والنيل الارض و البور مشتت متنسى
ونجامة التعب الكعب ما كان عول ريدي
ريدي الصبح صفاف هدير البر ايامي توب شحات
هزاه خم و خم
انا ما لقيتك ليه طعم الفراق دمدم
ختيتي فوقي الليل والليل سقاني السم
انا خاطري فى المطره ريحة الدعاش والشم

سافر مطارات الوداع ضجت قدامك وراك بيضا
وسماك غنائ
مساحات الاسئ الفى عيونا تتفجر مدينة ونائ
بطاقات دعوة الرجعة تساب عينين من الفرة
دموع للحاضرين فجت زغاريد غطت الدنيا
وعاد فرح الرجوع منيه صداك الريح
ومن السنبل الغناى
كتير بنعاتب الحاضر ولا اسفا على الماضي
صدق الرؤية من قلبك نغم فنان يعيش راضي
مداك اتعدى حد الشوف
دخلت على الشعر انسان
هواك اتخت جوه الجوف
وانتحر النهار هسه
نغنيك لى مدن شاخت
معاك احلامي ما تنسى
تغنيك القرى الراحت
خلاص يا غربه ما ترسى
غنيناك وبنغني
وبنتحدى الزمن فنان

سحابات الهموم يا ليل بكن
بين السكات والقول
وباقات النجوم الجن يعزن فى المطر
فاتن عزاك رجعن
وشوق رؤياك
زمان مشدود على اكتاف خيول هجعن
وصوت ذكراك مكان يجري
يلاقى السيل
وسر مدفون بصدر النيل
ولولا الذكرى مافى آسف
ولا كان التجني وقف
وصوت ذكراك رزاز صفق
على خطوات بنات سجعن
وشوق رؤياك
حنين لى رحلة فى المجهول
ولولا الذكرى ما فى وصول
ولولا الذكرى مافى أصول
ولولا الذكرى ما فى شجن

بقول غنوات و اقول غنوات
فى البلد البسير جنياتها لى قدام
ولى الولد البتل ضرعاته فى العرضة ويطير فى الدارة صقرية
ولو السمحة تلت إيد ومدت جيد يقوم شايلاهو هاشمية
ويشيل شبالو ختفة ريد وفرحة عيد وريدة روح وحمرة عين وايدية
ويا الولد البشيل مدقاقو قولة خر على القمرة
يقابل الجاية متحزم ويدارك الجاية متلزم
كلام فاسك على ارضك يبقى عديله يا بيضاء
ويبى زفاف تزغرد ليه قمرية
وقبال حول تغيم غيمة قبلية
ترش الدارة و الحدبة الصعيد الحلة
ويا فرحة بتطارد الصفقة فى النسمة الصعيدية
ويا جهرة نهار الليلة بدرية
رحيح جنياتنا فى الحدبة الصعيد الحلة يا سمحاتنا هو لبلب
يا قمحاتنا هو لبلب ويا اللوز الفتق فى الوادي هو لبلب
ويا حجواتنا يا صلواتنا هو لبلب
سالتك بالذى ركز الارض معبد وسى الفاس عليها مقام
سالتك بى حشا الامهات ودمعتنا
سالتك بي كبيداتنا ودعواتنا
شليل وين راح .. يكون ضل الخريف فاتنا ... شليل وين راح
وزي برق السماك الجابها دغشية وزي زغروده البطن الكبارية
ومقدم بالعديل يبرا
تعالوا ابشروا يا جنيات
شليل ما راح شليل عند المسورو حرق بقالو حصاد
شليل فوق التقانت قام خدار وبلاد
شليل مسدار شليل مشوار
شليل ارضنا يا جنيات شليل قايم نصاصي الليل يتمتم ليلو وردية
حرازنا شليل شليلنا دليب شليلنا دليل على البلدات بعد درب التبلدية
شليل ما راح شليل ما فات
شليل ونحنا همباتة ومهاجرية مزارع بات على عشقين
تراب بلدو وسماح فوق بت مزارعية

رجعلك قليبي المهضلم يراجع صنوف الغناوي العصية
يراجع معاك الكلام القبيل استباك الكلام المبهرج وخاوي
الكلام المزيف ولا فيه غير احتلام وانفصام تموت الحروف يوم تقوم القصائد مقام الطبول والبخور
بشوفك جرايد شواكر حوامد
ولا هامي فيها
عليها المصائب تمام التمام
مغايص بتفرم حشاها وغبائن بتنفخ بطون البسفو التراب
وحايح لهب البتفلح تلهلب وتكوي الجلود ... القصائد
اذا ما القصائد دايره ليك البكاء البصاحب رضا السردار
و ... القصائد اذا ما القصائد بتنزل مريده وتسبح بحمد
الذى ابتلاك وهداني الودار
طريتك وانا الكنت قايل خيالك معشعش جواي
سكنتك وما لاقى فجه اخيرلك اقول البحرق حشاي
اخيرلك افضفض جراب الخبايا
اقول الكلام البفكك سوارك يوقف جدارك ويرفع عضايا
تضيع الرموز التغتي الكلام
اقول السكاكر ابتني ورمتني وكفانا
اقول العساكر تباري الكباري
وتفتش قلوب الجهال الشلوخهم هوية
واغني الزيود و الكنانة ... كضب
اقول البنات البفتحن صدورن يقالدن رشاشك
ويخلن حبيبن ....كضب
مراحك يعشى ويفشى خضارك مرطب يندي الضهارى
بلادك ولادك كروها السحالى
تسفر سعيتك تقنب تباري الجداد العقالي
تجوع يا البشدر خريفك سوافى البطانة
وتمطر رزازك عزازا حصايا
وقموحك سنابل مشاطر كردفالي
ابيت الكلام المغتغت وفاضىو خمج
ولادك قصادك شعاع التحايا يضوو الشقوق
التلم الدوابي
يورو الدروب للقلوبهم عمايا عرقهم حبالك
وصوتهم مشانق تلم الدقون الكبيره
وتحدر فقر سمناتها الليالي الضليمة
بتهدر حرائق وتحمي البياكلوا المطايب
وتسجن بطون الجياع العرايا
وشوشهم سمر حر ابطاك
صفوفهم مرامك وحلمك حلمهم رغيفة وكرامة وسلامة
مصانع بتحرق قبل تبدا فيها
مزارع تيبس ونيلك ممدد جنازة
وعقيدك وسيدك بيكتب ويمحي
وتبقى المحايا

نفسي فى داخلك اعاين أروي روحي واشوف منابعك
الصحراء في عيني تتواثب جناين ماخده صوتك من جداول
وشايله صورتك من كهارب مولدا ميدانه حافل
كل ما يصبح تجيهو الناس جحافل
يا سلام
لما تعبري فى الشوارع شوفى كيف الناس تصارع
ناس تطفر وناس تدفر فى البشابي على نجومك
وفى البخب كايس تخومك
وكل زول من عند سلفك لا لا قال دايرلو كاس
مره طربان شلت صوتك شان اغني
قلت آه ياليل وأه
انت اول...انت تاني..انت تالت... انت رابع
نافره زي صيد الخلا وساقية زي نبع المنابع
وقلتلي غناي خلاص
حلوه عينيك زي صحابي عنيده كيف
تشبه شريحتين من شبابي
زي عنب طول معتق فى الخوابئ
وسمحة زي ما تقول ضيوفا دقو بابي
فرحي بيهم سال ملا حتى الكبابي

في عيونك ضجة الشوق والهواجس
ريحة الموج البنحلم فوقو بي جية النوارس
يا ما شان زفة خريفك كل عاشق ادى فرضه
ما فى شمسا طاعمه طلت الا تضحكي ليها برضه
والغمام الفيك راحل فى الصنوبر يلقى ارضه
و الصباح امتد يا ما كل ما جاوبتي نبضه
نشتهيك
يا ما نحلم نحكي ليك عن المسافة
وعن سفن بالشوق بترسم فى بحيراتك ضفافه
عن ملامح غنوه طلت فى عويناتك هتافه
عن حقيقة نهاتي بيها فى اساطير الخرافه
يا صباحات المواني حتى لو دربك ترنح فى مشاوير الاغاني
و الجرح إرتد بينا لي زمان الآهة تاني
يا غنانا المشتهنو يا ني موعود بى زمانك
بي مواقيته البرنو
بارتعاش صرخة وجودك يوم يطل ميلادي منه
لما اتوسد صباحك ياتو ليل يفصلني عنه

حاجة فيك
تقطع نفس خيل القصائد
تشده اجراس المعابد
توهتني... تعبتني... جننتني
جننت حرف الكلام
وبرضو ادتنى السلام
حاجة فى شرف المدائن
فى غرف كل السفاين
جوه فى عمق المناجم والعيون
حاجة زي ما تكون محلق فى العواصف
فجاءة تهبط فى السكون
حاجة زي نقر الاصابع
لما ترتاح للموسيقى
حاجة زي اخبار تناغم من جريده
حاجة زي وتر الموانئ
لما يصدح لسفينه
حاجة فيك
لا بتبتدي ... لا بتنتهي
خلتني ارجع للقلم
اتحدى بالحرف الالم
و اضحك مع الزمن العريض
وانسف متاريس الطريق
واعرف متين ابقى المطر
وافهم متين اصبح حريق

ها هي الارض تغطت بالتعب
والبحار اتخذت شكل الفراغ
و انا مقياس رسم للتواصل و الرحيل
وانا الان الترقب وانتظار المستحيل
انجبتني مريم الاخرى قطاراً وحقيقة
ارضعتني مريم الاخرى قوافى ثم اهدتني المنافى
هكذا قد خبروني ثم قالوا لى ترجل
ثم انت
انت يا كل المحاور و الدوائر يا حكايات الصبا
تحفظين السر و المجد الذى ما بين نهديك اختبأ
ليس يعنيك الذى قد ضاع من عمري هباء
وانا لست ادري ما الذى يدفعني دفعاً اليك
ما الذى يجعلني ابدو حزيناً
حين ارتاد التسكع فى مرايا وجنتيك
لا عليك
فعلى هذه السفوح المطمئنه نحنا قاتلنا
سنينا واقتتلنا
نحن سجلنا التآلف فى انفعالات الاجنة
واحتوانا البحر و المد اليقاوم و الشراع
يا هذه البنت التى تمتد فى دنياي سهلا وربوعا وبقاع
ما الذى قد صب في عينيك شيئا من تراجيديا الصراع
و المدى يمتد وجدا عابراً هذه المدينة
هل انا القاتل والمقتول حينا و الرهينة
هل انا البحر الذى لا يامن الان السفينة
خبئيني بين جدران المسام
قبليني مرة فى كل عام
فنا اشتق ان اولد فى عينيك طفلا من جديد
ارتدي اللون البنفسج
اعتلي شكل الهوية
ضيعتني مريم الاخري سنينا فى انتظار المجدلية
آه لو تاتين آه
من عميق الموج من صلب المياه
كالرحيل
كالترقب
وانتظار المستحيل

جلبت ليك من بلاد الله البعيده
صنوف من الوجد الملح
درته القاك بالسمح
كنت اصطاد في الظهيرة
من مناقير الكنار
بوصلات سكك الاغاني
ومن قرى الليل القصية
انتشل عطر الاماني
لو القى اللون ادسه
لما يغرس فيني حسه
لي ملاقاتك هدية
و...قد الرعشة المعبية
فى ايديا

ح تجي البت الحديقة
فارده انسام فى طريقه وشايله الوان
ح تجي البحدث بريقه ضجة الضوء في المكان
ح تجي ال من بدري جات
من ضلامات السكات
شايله قمرين في عيونه
وفاتحة ليلين من جنونه
وضاويه ساحات
انتمت لى فجر فات
وتنتمي لعصور جديده
ح تجي البت البريده
ضاحكة منتصره وعنيده
آمله مزدهرة وجديدة
وناقشة فى الزول اغنيات
ح تجي ال من بدري جات
ناسفة ازمان الثبات
واصفة للناس الطريقة
وللعصافير الجهات

لمن يجي الزمن الفلاني
سمانا بتقطر مطر دري وتماذج برتكاني
نسطر اسمك يا حبيبنا
فى رموش غيم ارجواني
ندمن الضحك المعافى
نحيا فى الفرح المورد
ياسمين اقحواني
يا حبيبنا جوه عينيك عايشه ناس
بتسجل الايام اغاني
و الطريق ما ببقى ساهل
ليك بالمعنى المكاني
لما يتحقق زماني
بمسح الحزن المعشعش
فى عيونك اسمراني
يا حبيبنا بتحيا
فى حلم الترابلة
فى العلاقات المعاني
فىالبقاسى شقا المسافة
وعايشه فى داخله وبيعاني
لما يتحقق زماني
بشرق الفجر الحقيقة
و الصباح الابيضاني

بعيده عني
خطاك ما لامست وجه الطريق
ومشيتي
لافوق غيمة لا ظني بعيد عني
كامن وراء صفحة زجاج مبلول
وراك الريح وقدامك
مدى السكة وندى المجهول
اناد ليك ... وجيده .... وجيده

لا اتلفتي لا لوحتي بي ايديك
انادى ليك
يجاوبني المدى الفاتح مدارج الهم
بتبقي وجيدة طعنة سيف
موسدة فى شق السماء المرسوم
وسادة دم
وتبقي ايدينا فى ايديك
وفى شعرك وفى المنديل
وفى ايديك بعيده عني

اظنك عرفتي عواصفك مهبي
اباري في خيالك يسوقني ويودي
ونهرك يعدي ويجهل مصبي
هواجسى البتزرع وظني البربي
بديتك خواطر بتصحى وتساور
وطيفك يزاور وروحك تحاور
تجيبني فى زمانك موشح اساور
اقول بس نسيتك وجرحك يتاور
اظنك عرفتي عذاب المغني
وطبله المجدع شظايا التمني
حروفه البتجزع فى لحظة تجني
خطاه البتهرع متين تطمئني
مسرج خيالك حصاني القبيل
معربد غباره وخلى الصهيل
مسافر مسافر وفاقد دليل
اظنك عرفتي هموم الرحيل

في عينيك عشم باكر
وزغرودة تزف للناس خبر زمناً جديد مولود
لقيت غيرك بضيع اسمة واكون انا حيّ وزي مفقود
لاقيني يا شوقى الخرافي
لاقيني قبال الزوال
لاقيني فى كل المرافئ
زفاف ربيع وفرح قوافئ
وانشرى فى حزن السنابل
غيمة يا كل المشاعر
وامشى قبال الصباح وزعى الطلّ للازاهار
وابقى يا شوقى الخرافى
طير وضمى شقى الفياتر
لاقيني يا شوقى الخرافى
لاقيني قبال الزوال
غنوة من ازمان بعيدة
طالعة من صفد الدميرة
تلقيني راجيك فى الاماسى
وفى المراسى
وفى الملمات الخطيرة

من بعد ما عز المزار
و الليل سهى وملت نجومه الانتظار
و الشوق شرب حزن المواويل وانجرح آخر النهار
وبقيت اعاين فى الوجوه
واسال عليك وسط الزحام قبال اتوه
يمكن الاقى البشبهك
ما الليل براح والشوق تعالى بندهك
شايلاهو وين النيل معاك
عصفوره جنحاته النجوم وانا بى وراك
بسأل عليك مدن مدن واعصر سلافة الليل حزن
بسال عليك فى المنفئ فى مرفئ السفن
يمكن طيوفك اخريات الليل تمر
تملاء البراحات الحزينة طول العمر
ما نحنا بينا الامنيات و التضحيات
بينا الهوى اخلاص على القلب انكوى
وكلام قديم قلناهو اخر الليل سوى
انه راح نتلاقى لو طال النوى
لكن كلامنا الكان خايف يكون شاله الهوى

لو منى مستنى الملام
يا سلام عليك يا سلام
يا حلوه دا السكوت مرات كلام
وعدم الملام هو كمان ملام
انا يا غرامي وصلت بيك فى الدنيا لى حد الغرام
ولقيت ملامي على عينيك
يا سيدى ذى الما ملام
الوردة لو فاته الفراش
ما اظن تلومه مع الندى
ما بتجرح احساسه الجميل
و الريده يا حنين كده
دي الريده يا حنين كده

يا سر مكتوم فى جوف اصداف
فتشت عليك بقليب نزاف
لا خبير يهدي لا دليل وصاف
راجياهو الريح وكتين ما تطل
على موج تمرجح زهرة فل
وتشيله تروح و الدنيا تنوح
على قمرا فات فى مطر الليل
يتم نجمات بكاها السيل
و الريح القاسية عنيده تمام
صفدة القنديل الكان مقدوح من دمع الليل
رمت القنديل الكان نديان فى جرف النيل
رسمت احزان وسؤال حيران
فى عيون ايتام
يا عمر مرسوم فى كف اقدار
يا خطاى طال بيها المشوار
يا ليل مشتاق لى دفة نور
يا ظلمة تبكي سناء البلور
يا موجه تعاند فى التيار

افتقدتك
افتقدتك يا صبا عمرى وشبابى
افتقدتك لما زاد الشوق عذابي
افتقدتك فى غيابى وفى اغترابي
وافتقدت الابتسامه
والعيون الساحره يوم يسحر كلامها
ويا حبية عمرى فى الدنيا وزحامها
اكتبي لي عن سنينك
وكل يوميه بتمر بتزيد حنينك
واكتبي لي عن مشاغلك
وقولي لي عن أي شي فى
الدنيا شاغلك
واي زول في الدنيا لو سألك عليا
قصدو يعرف ايه علاقتك انتِ بيا
قولى باكر ايوه راجع جاي ليّا
  رد مع اقتباس
قديم 23-09-2005, 08:56 AM   #27
Guest
 
المشاركات: n/a
افتراضي

فوق
  رد مع اقتباس
قديم 23-09-2005, 02:19 PM   #28
sawra
Guest
 
المشاركات: n/a
افتراضي

العزيزه بيان
شكرا علي هزه الروايع واقف عاجزه لاادري ما اقول
تحياتي
  رد مع اقتباس
قديم 22-09-2011, 10:55 PM   #29
ود الشيخ
عودوا طيفا أو خيالاً وكلموني
 
الصورة الرمزية ود الشيخ
 
تاريخ التسجيل: Apr 2005
المشاركات: 30,367
افتراضي رد: القاك وين كان الفرح قفل مسامات الضياع

القاك وين كان الفرح قفل مسامات الضياع
__________________
لك الحسن فى الحياة مراح ولى الحب فى وداد مريد



ود الشيخ غير متواجد حالياً   رد مع اقتباس
قديم 09-11-2011, 01:49 PM   #30
نبض الحياة
 
الصورة الرمزية نبض الحياة
 
تاريخ التسجيل: Jun 2010
المشاركات: 596
افتراضي رد: القاك وين كان الفرح قفل مسامات الضياع

رحم الله الفنان الكبير مصطفى سيد أحمد

لا يتخير غير الشعر العميق الهادف

موش زى كلمات أغانى اليومين ديل

التى لا يصح أن تسمى قصائد غنائية

بل نثر ركيك بلا لون و لا طعم

حليل الراحو و يا حليلنا فى الزمن ده
نبض الحياة غير متواجد حالياً   رد مع اقتباس
قديم 26-08-2012, 01:37 AM   #31
الحافظ محمدصالح
 
تاريخ التسجيل: Aug 2012
المشاركات: 1
افتراضي رد: bayan القاك وين كان الفرح قفل مسامات الضياع

روعة والله ونتمنى المزيد من الابداع
الحافظ محمدصالح غير متواجد حالياً   رد مع اقتباس
إضافة رد

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع


الساعة الآن 10:23 AM


Powered by vBulletin® Version 3.8.7
Copyright ©2000 - 2014, vBulletin Solutions, Inc.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل الرأي الرسمي لصاحب الموقع أو سودانيز اوف لاين بل تمثل وجهة نظر كاتبها .