مركز تحميل الملفات



العودة   المنتديات > منبر الأعضاء الـحــــر

منبر الأعضاء الـحــــر لمـنـاقـشـة المـواضـيع العــامـة منتدى خاص بالاعضـاء

« آخـــر الــمــواضــيــع »
         :: المهندس مصطفى من قامبيا (آخر رد :Rami)       :: مررت بالمنبر العظيم أسأله هل في البورد حمام وحبان (آخر رد :مجاهد ابراهيم)       :: سوداني يقتل ابناه الاربعة وزوجتة ثم يقتل نفسه بحي غبيراء (آخر رد :عبد السلام)       :: عيييييك المنتدي اتلحسسسسس (آخر رد :مجاهد ابراهيم)       :: وفاة الفنان الكبير عثمان اليمنى(اللهم أرحمه (آخر رد :نبض الحياة)       :: مقعدين وكبايتين شاي' (آخر رد :مجاهد ابراهيم)       :: مقعدين وكبايتين شاي' (آخر رد :محاسن النور)       :: حلمت حلم اسد وشكله وسجاره (آخر رد :نادر ليمونه)       :: من إشراقات الأوف لاين (آخر رد :Gamar Alanbia)       :: اذا خير الشعب بين هذا النظام وعودة المستعمر البريطاني من يختار (آخر رد :twigstwigs)      

إضافة رد
 
أدوات الموضوع انواع عرض الموضوع
قديم 29-04-2006, 11:22 PM   #1
الشفت
Guest
 
المشاركات: n/a
افتراضي محسن خالد – أصلحت الكتابة في المنبر .. فمن يصلح ما تفسد ؟

يعتبر البوست إصلاح الكتابة في المنبر الحر من أجمل بوستات المنتديات السودانية والعربية قاطبة ، إن لم يكن أجملها إطلاقا ، وبالنسبة لي هو أفيدها ، فالرجل ( محسن خالد ) اتضح انه نحوي ضليع ، لم يكتفي بالنقل والحفظ فقط ، لكنه يجتهد محاولا التجديد في اللغة ، وهي تقبل ذلك لأنها تتطور تطور الكائن الحي .
لكن محسن خالد في محاولته إصلاحه كتابة الكتاب في منبر اون لاين ، شطح وشط بالبوست وخرج عن هدفه إصلاح الكتابة إلى أمور أخرى ، اعتقد انه وفق في بعضها وجانبه التوفيق في أخريات – بفرضية حسن النية في تفسيره الغريب – وسأحاول الرد على بعض الأمور التي أثارها ، وستكون الردود من وجهة نظري الشخصية – وما أنا بعالم أو فقيه ، لكن تجليات الترابي هذه الأيام وتجليات محسن خالد ، شجعتني على الخوض في ذلك ، يمكن تلفق معانا

  رد مع اقتباس
قديم 29-04-2006, 11:59 PM   #2
الشفت
Guest
 
المشاركات: n/a
افتراضي


اللبيب بالإشارة يفهم

محسن بقول
"مثلاً يقولون (اللبيب بالإشارة يفهم) أنا فوراً أجيب: دا العوير البفهم بالإشارة، أو الأبكم، اللبيب بدون إشارة بفهم،.."
ويقول
"فكما أسلفت لصديقنا محمد الأمين موسى، اللبيب –المتلقي هو الذي يفهم بدون إشارة، واللبيب –الكاتب، هو أيضاً من يُبَلِّغ بالحروف دونما حاجة لـ"رموز" إلا فيما هو ضروري،"
يكون ما كتبه ويظنه محسن صحيحا إن كانت الإشارة مصاحبة للغة ( شوف او سمع ) وبتبقى الإشارة في الحالة دي زيادة يحتاجها من يقصر عنده البيان ليتمها موية زي ما بقولوا ناس الجيش ، وطبعا الكلام ده ما بعجب ناس المسرح وناس اللغات البصرية ، عشان ده عمود أساسي في شغلهم ،
لكن في حال كانت الإشارة وحدها ، والإشارة هنا اعتقد انه مقصود بها جميع الإشارة ، باليد بالراس بالشلوت بالعيون إيماءة غمزة ...بكون قمة الذكاء والفطنة انو تفهم بي إشارة بدون صرف عربي كتير
اعتقد من وضع المثل يقصد إشارة بدون مساعدات منطوقة ومحسنات بديعية ، مكتوبة أو مسموعة ، إشارة حاف يعني ، إشارة بحته ، تأخذ مكان اللغة والحديث ويستعيض بها عنه ، و هذا مستوى عالٍ( إن شاء الله تطلع صاح عالٍ دي ) جدا من التواصل يتطلب توافق فكري وخبره – زي ما بقول عادل إمام – أو فطنة وذكاء ، لا يفوقها شي إلا التواصل الحسي غير المنظور بتاتا ، تخاطب العقل مع العقل بدون وسيط ، وهو شي لم يثبت بصورة قطعية بعد ، إذا أو إذن – البتعجبكم فيهن - من يفهم بالإشارة فقط بدون لغة ( مكتوبة منطوقة ) ودون شرح هو لبيب ( والله اعلم ومعاه الناس الفاهمين شديد )

ــــــــــــــــــــــــــــــــــــــــــــــــ

تخريمه واجبة
بالله عليكم الله أي ضرسه لغوية ولا خطاء إملائي فوتوه لي أخوكم ، يعني ما تدوني اعد طوالي ، اصلي من زمان عندي مشكلة مع الكتابة .
قر قر قر قر قر قر
حتى وقعت طاقيتها على قول تماضر شيخ الدين ( يطراها الله بالخير)
  رد مع اقتباس
قديم 30-04-2006, 12:38 AM   #3
kijinki
 
الصورة الرمزية kijinki
 
تاريخ التسجيل: Jan 2006
الدولة: China-guangzhou
المشاركات: 2,084
افتراضي

الشفت
الشوق بحر....
متابعه لصيقه.....
واعجاب بلا حدود...........
__________________
مالك يا زمان شبَّعتنا وِح ووحيح
صِح الدون كِضِب .. كِضْب العوالي صحيح
يات من كان أنا جعلتو ليَّ صليح
عقرب حزَّ ليَّ و يا نفسي زين ومليح
kijinki غير متواجد حالياً   رد مع اقتباس
قديم 30-04-2006, 01:59 PM   #4
asim_mash
 
تاريخ التسجيل: Jun 2005
المشاركات: 3,839
إرسال رسالة عبر MSN إلى asim_mash إرسال رسالة عبر Yahoo إلى asim_mash
افتراضي

الشفت قلنا نسلم عليك ..
الترابى مفكر اسلامى لا خلاف فيه

لكن اخبث من مر على وجه الارض ..

الاسلامين هم سبب مشاكل السودان وهم سبب كل حروبات السودان
لعنهم الله ...
__________________
لا يهمني متى واين سأموت.
لكن يهمني ان يبقى الثوار منتصبين،
يملأون الارض ضجيجا،
كي لا ينام العالم بكل ثقله فوق أجساد البائسين والفقراء والمظلومين
asim_mash غير متواجد حالياً   رد مع اقتباس
قديم 01-05-2006, 12:45 PM   #5
شهبندر
Guest
 
المشاركات: n/a
افتراضي

الشفت .. سلامات
تعرف لما قريت عنوان البوست ..
محسن خالد ..
فمن يصلح ما تفسد ..
طوالي خطر على بالي " السيكو سيكو"
:wink:

ما مشكلة ..
حسن الظن
  رد مع اقتباس
قديم 03-05-2006, 06:52 PM   #6
الشفت
Guest
 
المشاركات: n/a
افتراضي

kijinki
تسلم يا حبيب
الله يديك العافية


asim_mash
عاصم يا فرده
صدقت ف دي الترابي اخبث من مشى على وجه الارض في حاضرنا

سلامات يا حبوب


شهبندر

خهاهاهاهاهاهاهاهاها
هاهاهاهاهاهاها
الله يجازي محنك
مشتاقين وكده
  رد مع اقتباس
قديم 03-05-2006, 07:00 PM   #7
الشفت
Guest
 
المشاركات: n/a
افتراضي

رد محسن خالد .......

اقتباس:
...


فيصل نوبي،..
مرحب بيك كتير، وأهلا
في أول مداخلة ليك،..
وكن بخير
تحياتي للأخ كاتب البوست،..
وقولي له:

هذا المثل لا يتحدّث عن الإشارة، وإنما عن الذكاء والنباهة...
والتواصل التقليدي، عبر اللغة والإشارات،..
بينما مادة المحاكمة هي سرعة الفهم، الانتباه، الإلماح،
الذي قلته أنا: أنّ نابههم هذا إن كان نبيهاً بالفعل، فسيتواصل عبر عقله وحدوسه الخاصة، ولن ينتظر حتى يلكزوه بالإشارة، هكذا ما زادوا على أن جعلوا منه متأخراً في الفهم، مش متأخر وبس، وإلا يدردقوا ليهو فهّامات كمان،...
هنا الكلام عن حالة بأكملها وليس عن مفردة "الإشارة ودلالاتها"
هنا في قصة زول ما فهم براهو، أشّروا ليهو عشان يفهم،..
هاك قصة للإشارة لدى أفضل إحالاتها،..
في واحد في حلتنا ما بعرف ياكل إلا مع مرتو، طبعاً دا بَطَال في أعراف الجعليين،
الراجل الضو مفروض ياكل في ديوان مميّل علي الشارع وبابو مفتوح لديمة
الزول دا عندو ولدو صغير مصلّت، أمو قالت ليهو تمشي تقول لأبوك ختينا الفطور
بس أوعك تقول ليهو قدام الرجال المعاهو،..
الشافع وقف لأبوهو في الباب وناداهو: يابا تعال، أنا دايرك،..
طبعاً داك مجتمع ما عندو حاجة اسمها خصوصية،..
اتشالبوا الشافع طوالي، يا ولد قول ساي عان الرويس،..
الشافع أب صنقور دا، هسع أبوك الملخلخ دا يقوم يجيك بره هو..
والله ولادة آخر زمن، شوفو منفنس كيفن!
أبوهو عارف قصة الشافع ياتو قصة، لكن يقول شنو؟
أها فيهم واحد ظريف داير يتلاعب علي الشافع، قال ليهو أسمع:
نحن بنغمض وإنت كلّم أبوك بالكلام الدايرو،..
الشافع قال ليهو لكن ما بتفتحو، حاول يطمّعهم في غباهو،
وإنو كيشة ويمكن التلاعب بعقله... قالوا ليهو أيوة ما بنفتّح،
قلنا الشافع مصلّت، كلهم وافقوا يغمضوا، وهو يتكلم
قال ليهم أحلفوا، حلفوا ليهو بكل جدية باعتبار إنو هو ولد مغفل،..
الجماعة غمّضوا كلهم، الشافع "أشَّر" بايدو علي خشمو، حركة الأكل المعلومة،..
أطلق (الإشارة) مبلّغاً رسالته، ثم أطلق ساقيه للريح،...
الإشارة هنا قلنا لدى أفضل إحالاتها،
ومع ذلك احتاجت لتعطيل "بصر" المستهدَف، كي تكون ذات قيمة،..
كونا بخير،..


...
  رد مع اقتباس
قديم 03-05-2006, 07:01 PM   #8
الشفت
Guest
 
المشاركات: n/a
افتراضي

اقتباس:
هذا المثل لا يتحدّث عن الإشارة، وإنما عن الذكاء والنباهة...
والتواصل التقليدي، عبر اللغة والإشارات،..
بينما مادة المحاكمة هي سرعة الفهم، الانتباه، الإلماح،
الذي قلته أنا: أنّ نابههم هذا إن كان نبيهاً بالفعل، فسيتواصل عبر عقله وحدوسه الخاصة، ولن ينتظر حتى يلكزوه بالإشارة، هكذا ما زادوا على أن جعلوا منه متأخراً في الفهم، مش متأخر وبس، وإلا يدردقوا ليهو فهّامات كمان،...
هنا الكلام عن حالة بأكملها وليس عن مفردة "الإشارة ودلالاتها"

نشكر الاديب كثيرا
ونتمنى ليه تمام الصحة

طبعا متفق معاك في انو مادة المحاكمة هي سرعة الفهم، الانتباه، والالماح
لكن ادوات التحكيم هي شنو ؟
اللغة ( شوق وسمع )
الاشارة ( كافة انواعها )
التواصل الحسي ( العقل مع العقل بدون وسيط)


اعتقد ان ترتيبها كما هو عالية اللغة فالاشارة فالتواصل الحسي ، اذا استخدمنا كلا منهم على حدى
بمعني لغة براها اشارة براها وتواصل حسي براه او الثلاثة مع بعض وهو ما يحدث كثير بل هو الاساس في التواصل بين البشر
يحدث ان نستخدم انثين من الثلاثة مع بعضهم عند التواصل
لغة مع اشارة في حالة الونسة نستخدم اداوت الجسد ( يدين ، الوجه ، ...) وفي حالة الكتابة نستخدم اداوت الاشارة ( ؟، ! ، ...)
لغة مع تواصل حسي (تتمه نقصان اللغة بتواصل فكري وهذا يحدث غالبا عند من يتواصلون مع بعض كيثرا ومع كثرة التواصل يختصرون اللغة - مسموعة منظورة – ويفهمون البقية بالفطرة استنادا على مواقف سابقة تكررت كثيرا .
اشارة مع تواصل حسي
الثلاثة مع بعض
طبعا لو كان التواصل حسي فهذا قمة الفهم
ويليه التواصل عبر الاشارة حاف بدون لغة
ثم التواصل عبر اللغة

وعشان كده بكون لبيب هو من يفهم بالاشارة
ونحن نضيف ليها من عندنا كلمة فقط

ويبقى المثل
اللبيب ، فقط بالاشارة يفهم

مع خالص الود

نمشي لي قدام
__________________
  رد مع اقتباس
قديم 03-05-2006, 07:03 PM   #9
الشفت
Guest
 
المشاركات: n/a
افتراضي

محسن خالد كتب

اقتباس:
إقتباس:
(إنسان) أم (بشري –آدمي)





هناك اختلافات واضحة أيضاً وضعها القرآن بين المفردتين "الإنسان" و"بشري، آدمي" كمفردة واحدة، وهذا ما لم يلاحظه الكثيرون من المتدينين حين الحديث عن نظرية "دارون"، أنا طبعاً لستُ معجباً بنوعية "عبد المجيد الزنداني" و"مصطفى محمود"، فهما يحاولان تبرير الإعجاز بالعلوم، ولكنهما يشردان شردة بنات القنديل ليموتا بعطشهما في قلب الخلاء كما يُقال (عطش بنات القنديل) في أدبيات مجتمعنا الصغير، يحدث ركضهما عندما يتعكلت لهما العلم مع نصوص أخرى، شخصياً أفضّل طرائق بتوع السيميلوجيا، في التعامل مع النص بحياد كبير، وبالقراءة له فعلاً، وليس إنجاز الإسقاطات عليه، القرآن بشكل واااضح، وسااافر، ميّز بين (الإنسان)، وبالمناسبة القرآن لا يذكر هذه المفردة إلا ومتبوعة بالشر، فيما يُشير إلى الطور الأولي والمرحلي منه، ثم يتحدث عن "الآدمي أو البشري" بصورة أخرى، تشبه أن تكون صورة المُكَلَّف والراشد، صورة البشري الذي زاد جردل "دنقوسه وفاخورته" عن آخر في ماضٍ سحيق كان حجم (رأسه) أصغر، والدماغ الداخلي نفسه "كمادة سائلة ولزجة" كانت أقل أرطالاً بكثير عن (بشري) اليوم،..
(للمزحة بقولوا ليك خليك إنساني، وعندك إنسانية، في حين أنَّ (الإنسان) القرآن مارقو كعب وبتاع دم وبدائي وطور أولي وبرايمري خالص، مفروض يقولوا خليك بشري وآدمي، الشوام بقولوا "زلمة آدمي"، ودي أجمل، من "زول إنساني")،..
يعني واضح في القرآن إنو آدم كان ("مدماك" زيادة) اتولَّى أمرو ربنا بنفسه، والإنسان داك كان قاااعد وتافه ومشهور بالتفاهة والدم، والملائكة فتحت خشومن (قالوا: أتجعل فيها من يُفسد فيها ويسفكُ الدماء، ونحن نسبّح بحمدك ونقدّس لك)،..
يعني هم عارفنّو وشايفنّو، مش موضوع جديد كليةً، كيف يكون (الإنسان) كان مقترح شاورن فيهو الله يادوووب، (إني جاعلٌ في الأرض خليفةً) وهم يكونوا ناقشنوا، أبداً، هم كانوا بتكلموا عن الإنسان، وما عارفين إنو ربنا نوى يطوروا ويعمل من (الفسيخ شربات)، والشربات ياهو آدم ذاتو،..
بل الكلمة مميزة تمييز واضح في آية تانية: (وإذ قال ربك للملائكة إني خالقٌ بشراً من صلصالٍ من حمإٍ مسنون)،..
وعشان ما يجي عبقري ويقول إذن (البشر) من طين (يعني شيء جديد) نسألوا من هسّع طيّب وداك من شنو؟
(الذي أحسنَ كلَّ شيءٍ خلقه، وبدأ خلق الإنسان من طين)،..
ولاحظ –كروائي- لطريقة السرد، ربنا هنا ما قال خلق البشري، وإنما الإنسان، لأنو النقطة صفر في تعداد آدم،..


هو الله شنو؟ الله عقل ضخم، بوسعه ترتيب كل هذا الوجود والمجرّات بحيث تصبح المسألة من الضخامة أكبر من خلق الإنسان كما يقول القرآن: (لخلق السموات والأرض أكبرُ من خلق الناس ولكنَّ أكثر الناس لا يعلمون)،..
قلنا آدم مدماك زيادة في بنيان الإنسان، والإنسان أقدم من آدم، وهسع نحن لو أخطأ أي شخص في حق الآخر يقوم صاحبو طوالي، يقوليهو: عادي، ما إنت أصلك وفصلك كَيْت وكَيْت، "اتطورت والله"،..
وربنا يقر بهذا الإنسان القديم، وحينما يخطئ يذكّره بأصله وفصله: (هل أتى على الإنسان حينٌ من الدهر لم يكن شيئاً مذكورا)، طيّب يا جاحد ما نحن رفّعنّاك من خامل الذكر لشيء مذكور وكائن مفكّر، من روحنا، أي من عقلنا،..

طيّب الملائكة غالطوا ربنا، قالوا (الإنسان) دا تب ما منو خير، أها ربّنا (قلنا زادو مدماك) وهو كان في التطور بلغ مرحلة الساقين، الاستقامة، يعني طلع من حارة القرود، ويادوب "صول إنسان" وما اترقى بعد "ملازم بشري"، ربنا قاليهم تعالوا يا ملائكة أنا العالم بكل شيء، وبما أفعل، ما إنتو، تعالوا أتفرجوا:

(وعلَّم آدم الأسماءَ كُلَّها ثم عرضهم على الملائكة، فقال أنبئوني بأسماء
هؤلاء إن كنتم صادقين (31) قالوا سبحانك لا علم لنا إلا ما علَّمتنا، إنَّك أنت العليم الحكيم (32) قال يا آدم أنبئهم بأسمائهم، قال ألم أقل لكم إني أعلمُ غيبَ السموات والأرض، وأعلمُ ما تُبدون وما كنتم تكتمون (33)

هسّع القصة دي ما واضحة جداً جداً، بعدين دارون دا ما لعب، صاح هو سرّاق، والتطور والنشوء هو ما أسّسوا ولا ابتدعوا إنما شغل دكتور من جنوب إفريقيا، ما متذكرو هسّع، أنا بكتب من راسي فوراً، ودكاترة كتار بتاعين تخصصات مختلفة في إطار الزولجي، دراوين لمَّ الشغل دا لأنو حريف، وكاتب ملعون ومسّكوا الدرب، زي شغل ماركس مع ابن خلدون، ودي طبيعة العلوم كلها كدا، مدماك فوق مدماك، لامن نصل قصور الكمبيوتر، ماعدا عبقريات شرسة وشاذة زي (نيوتن) والزول دا بالمناسبة كان حاسد وغتيت وشرير عديل كدا، وحشّ لهالي رأسو حش بملعنتو، أو (إنشتاين)،..
المهم هي النقطة نفسها التي وصلت منها الإنسانية إلى نظرية (الجيشتالت)، لأنو بتوع جنوب إفريقيا كانوا شَغَّالين في تجارب كثيرة وخطيرة، أهمها: هل القرد يستطيع أن يحسب؟ طبعاً مع تضمين جزئية، إذا كان الإنسان قد جاء منه!؟ وكان افتراضهم الأولي، نعم، وكانت الاختبارات كالآتي، يختوا "موز" جوه حُفرة ويخلوا القرود تشوفها، الكلام دا قديم طبعاً، أها ينزلوا راجل واحد جُوَّه الحُفرة، القرود ما بتجي للموز، الراجل يطلع من الحفُرة ويمشي بعيد، يختفي، القرود طوالي تجي مبرطعة للموز،..
طيّب ينزلوا راجلين، يفرتك منهم واحد "بس" القرود ما بتجي، يفرتكوا الاتنين القرود تجي دافرة، قالوا خلاص (القرود دي بتعد لاحدي اتنين)،..
تلاتة رجال، لامن يفوت التالت القرود تجي مبرطعة، خلاص القرود شاطرة وبتعد لاحدي الرقم تلاتة، والعلماء المتدسيين في الشجر يشيلوا ويصفقوا،..
أها، أربعة رجال، هنا القرود "دقست"، بمجرّد تالت رجل طلع جات مندعرة، لقت الرجل الرابع جوه الحُفرة،..
طيّب الاقتراح اللحظي الفطير إنو هي بتعرف تعد لاحدي تلاتة، ولساها كانت (نظرية الجيشتالت) مدّسية في الغيب، قاموا جوهم ليك ناس البصريات، والحجّة وقفت، إنو المسألة متعلّقة بالبصر "بنظرة كلية" مش بالدماغ، بالتالي قرد يعد واحد اتنين تلاتة، ما يفترض إمكان تعليمه -كطفل- العد إلى عشرة فما فوق،..
يعني القرد بقدر يشوف الجسم الكلي لتلاتة أشخاص، ولو الجسم دا، (أي النظرة) نقص، القرد بقدر يعرف، لكن لو الحجم الكلي للـ(النظرة)، زاد من (سعة نظرة لتلاتة أشخاص) كدا القرد لن يستطيع التمييز، يعني شغلوا مبني علي الكتلة، لا بعرف يعد ولا يحزنون، والموضوع عندو علاقة بالتحليل البصري، مش التحليل الفرزي الحسابي، بتاع البشر، يعني شغل كاميرات مش جداول ضرب وطرح،..
من هنا وُلدِت الجيشتالت، وتفرقت وتلونت في العلوم، التشكيليون جابوا لوحاتن وقعدوا يشخبطوا نظرة كلية وجزئية، مدى بصري كُلّي ومدى جزئي،..
ناس التربية جابوا سبوراتن وقعدوا يشخبطوا نظرية تعليم كلية وتانية جزئية،..
وعيييك، النظرية عارت، شوفتوا كيف شجر العلوم بقوم؟ دي الفكرة،..
نرجع للإنسان والبشري، والما فاهم كلامي دا يراجع نظرية الجيشتالت، أو كمان تساءل مع روحك ونفسك،..

(تساءل، على الدوام تساءل، ليس بالضرورة من أجل أن تحصل على إجابة، بل يكفي أن تفهم مدى وطبيعة سؤالك فحسب، يكفي، لأنَّ هناك من يركضون هنا وهناك بأسئلة لا يدرون عن تساؤليتها الحقيقية شيئاً)،..

هنا دراما الإنسان كاملة، من سورة البقرة وفي ترتيبها الصحيح:

((هو الذي خلق لكم ما في الأرض جميعاً، ثم استوى إلى السماء فسواهنَّ سبعَ سمواتٍ، وهو بكل شيءٍ عليم (29) وإذ قال ربُّك للملائكة إني جاعلٌ في الأرض خليفةً، قالوا أتجعل فيها من يُفسد فيها ويسفكُ الدماء، ونحن نسبّح بحمدك ونقدّس لك، قال إنّي أعلم ما لا تعلمون (30) وعلَّم آدم الأسماءَ كُلَّها ثم عرضهم على الملائكة، فقال أنبئوني بأسماء هؤلاء إن كنتم صادقين (31) قالوا سبحانك لا علم لنا إلا ما علَّمتنا، إنَّك أنت العليم الحكيم (32) قال يا آدم أنبئهم بأسمائهم، قال ألم أقل لكم إني أعلمُ غيبَ السموات والأرض، وأعلمُ ما تُبدون وما كنتم تكتمون (33) وإذ قلنا للملائكة اسجدوا لآدم فسجدوا إلا إبليس أبى واستكبر وكان من الكافرين (34))،.. سورة البقرة،..

وفي كتاب (التوراة، الإنجيل، القرآن، والعلم) يقف موريس بوكاي، وهو متحوّل للإسلام، مع سفر التكوين، لأنو دقس بطريقة لم يدقس معها القرآن، سفر التكوين طبعاً بتعامل مع أيام الخلق السبعة كأنها أيام فعلاً سبت أحد اتنين وكدا، بينما اللغة العربية بتسعف الواحد يقول (أيام العرب) والمقصود منها حروب دارت لعشرات السنين، اليوم في لغة العرب يعني المرحلة، وكدا القرآن ما دقس، لأنو التطور احتاج لملايين السنين، بس "سفر التكوين" دقس هنا بالإضافة لإنو بقول الله خلق البحار والنباتات وشنو وشنو وشنو، والناس ووو.. ومتأخخخر يجي للشمس والنجوم والمجرات، طبعاً الزرّة والحوشة هنا واضحة، لأنو الضوء كان في البداية عشان الشجر يقوم والناس ووووو..
حسب ملاحظتي وتتبعاتي، في أي مكان –قرآني- ترد رواية الخلق، الشجرة لا تتقدم السماء أبداً، ودي اللعبة كلها ضوء فكلوروفيل، أعطك حياةً....
شوف القرآن بداها صاح الصاح، ((هو الذي خلق لكم ما في الأرض جميعاً، ثم استوى إلى السماء فسواهنَّ سبعَ سمواتٍ، وهو بكل شيءٍ عليم (29)))،..
الآية دي طبعاً ما ذكرت خلق الشموس والأقمار وو. مفردات السقف، لكن برضو مشت في الناحية دي، في آيات تانية بتتكلم بالتفصيل، وهسع ما عندي زمن أمشي أكوسها وألقطها كلها، البلقى آية مشاترة يجيبها ويجي،..
يعني في قصة الخلق القرآن طوالي بمشي السماء محل بركبوا الكهارب والأساس مش الشكل، لبناء الكون ومن ثم الكينونة، ضوء فكلوروفيل، أعطك حياةً كما اختصرنا الموضوع....



ما يمكن إضافته أيضاً هو أنني كنتُ أتساءل عن: لماذا قال الله (عرضهم) ولماذا كلمة (هؤلاء)، المعلّمتان، هل يعني (الإنسان) و(البشري) أم ماذا؟ يعني شوفوا آدم القديم، وكمان شوفوا آدم المنفوخة فيهو الروح والتفتيحة؟
أم هل هو (الاسم) (الأسماء) مفردة مذكّرة ولذلك قال عرضهم وقال هؤلاء...
الصحيح طبعاً هو المقترح الثاني، الاسم مفردة مذكّرة وانتهينا، كي تبدأ الدراما الحقيقية لـ"السي إبليس"، يعني ربنا ما كان غالبو يكسر رقبتو وانتهى الموضوع، ولا إبليس هو ذاتو ند لله عشان يخش معاهو رهان بتاع انتصار! يعني المسألة لامن ربنا يرويها زي ما تقول كدا، وبدون تشبيه أو تأويل، تمشي لصاحبك في البيت وهو من النوع البريد شفعو جداً داك، ياخي نشوف الأخبار، هاهها ضحكة لطيفة يطلقها مُوجِد الوليدات، بجمال بمحبّة وتفرّج على نمو أرواح موجوداته، يجيبك: والله الشفّع ديل رموا التلفزيون من الطربيزة العالية دي وهسّع عند الصلاح،..
ويجيك شافع منهم ينقذ بمفاهيم احتجاج زي "أمل دنقل"، آي رماهو أحمد لطخ:
المجد للشيطان معبود الرياح
من قال "لا" في وجه من قالوا "نعم"
من علَّم الإنسان تمزيق العدم
من قال لا ولم يمت
وظلّ روحاً أبدية الألم

خليكم بخير كلكم،..
إن بقيت حي تاني بجي أونسكم،..
نواصل
  رد مع اقتباس
قديم 04-05-2006, 10:28 PM   #10
الشفت
Guest
 
المشاركات: n/a
افتراضي

]اها نبدأ نشوف الكلام الفوق دي حته حته
محسن قال :
شخصياً أفضّل طرائق بتوع السيميلوجيا، في التعامل مع النص بحياد كبير، وبالقراءءة له فعلاً، وليس إنجاز الإسقاطات عليه

ودي كلام عندي فيه راي ، حيث إن ( لقيتوني مذاكر موش ) النص كُتب وهو يحمل في داخله إسقاطات كاتبه مضمنه فيه بل هي لبه وسبب كتابته ، لا اعتقد أن هناك من يكتب بالحياد الكامل ولن تكون هناك كتابة أصلا مع الحياد الكامل وبالتالي لا يوجد من يقراء بحياد كامل ، فالبشر يكتبون ما يفهمون ويقتنعون به ، ويسقطونه في كتاباتهم ، وهم يقرءون بما يفهمون ، ويحملون في مخيلتهم ما يقتنعون به عند القراءة الأولية – يمكن فيما بعد ان تقتنع بوجهة نظر الكاتب وتكون في الحالة دي هي قناعتك - .
صحيح يفترض وأنت تقراء اصطحاب كل الفروض والآراء ،
لكن برضو العضم عند قرايتك بكون قناعتك ورائيك
يعني الحياد ده ما بكون إلا في كتابة الأرقام ، وكمان ما دايما

وهنا بتبرز أسئلة أتمنى الأديب يقدر يجاوب عليها

حينما نقراء هل :
1)نقراء لنفهم حسب ما نحمل من فكر متجاهلين ما يريد أن يوجهنا إليه الكاتب
2)أم نقراء ونحن نحاول أن نفهم النص وفق وجهة نظر كاتبه وماذا يريد من كتابته النص

ونفس الكلام عند الكتابة
هل نكتب لنا نحن ومن اجل أن نضع فكرنا في قالب مكتوب للجمهور ، ام نكتب وفق الفهم العام وزوق الجمهور وحسب ما يريد
؟؟؟؟؟؟

ده كله لمن يكون الكلام عن النصوص الوضعية ، والكاتب بشر زينا ،
اها كيف عندما يكون النص رباني والكاتب خالق ؟
هل سنتعامل مع القرآن بنفس الفهم مع كتابة البشر ؟


ومواصلين
  رد مع اقتباس
قديم 04-05-2006, 10:29 PM   #11
الشفت
Guest
 
المشاركات: n/a
افتراضي

محسن كتب

"القرآن بشكل واااضح، وسااافر، ميّز بين (الإنسان)، وبالمناسبة القرآن لا يذكر هذه المفردة إلا ومتبوعة بالشر،"

كدي نشوف اول شي الكلام ده صحيح

عملنا بحث عن كلمة الانسان في القرآن الكريم
وقد وردت فيه 44 مرة

والعاوز يتاكد يمشي الموقع ده ويفتش عنها
http://gooh.net/Quran/search.php

طيب

هل صحيح ان القرآن لا يذكرها الا وتكون متبوعة بالشر

الا دي ما اظن لكن في الغالب الاعم الكلام ده صحيح ،

مثلا

"يريد الله أن يخفف عنكم وخلق الإنسان ضعيفا" ص 83 اية 28 سورة النساء الجزء الخامس
لا اعتقد انها متبوعة هنا بالشر
طبعا ده مع تأكيد محسن في نفس البوست المصدر ان كل مفردة في القرآن وضعت في مكانها بعناية ، وانا اتفق معه تماما .
اذا ( اذن ) في الاية عالية لم يتبع كلمة الانسان الشر ، ليس كمفرده او معني

"ووصينا الإنسان بوالديه إحسانا حملته أمه كرها ووضعته كرها وحمله وفصاله ثلاثون شهرا حتى إذا بلغ أشده وبلغ أربعين سنة قال رب أوزعني أن أشكر نعمتك التي أنعمت علي وعلى والدي وأن أعمل صالحا ترضاه وأصلح لي في ذريتي إني تبت إليك وإني من المسلمين"
ص 504 اية 15 سورة الاحقاف الجزء 26
"خلق الإنسان من صلصال كالفخار"
ص 531 اية 14 سورة الرحمن الجزء 27

والايات الفوق دي كلها كوم
والاية دي كوم براها
"لقد خلقنا الإنسان في أحسن تقويم"
ص 597 اية رقم 4 سورة التين الجزء 30
بتخيل لي دي اية كلها جمال وما اظن احسن تقويم ده من الشرور ، وحا يكون عندنا كلام كتير عن الاية دي بعدين لانو محسن باني نظريته على انو الانسان القديم في اصدارته الاولى قبيح وراسه صعيروني وقريب للقرد منه للانسان ( حسب فهمي ) لكن نخلي الموضوع ده لمكانه خلينا هنا في مفردة الانسان وبس
"علم الإنسان ما لم يعلم"
ص 597 اية رقم 5 سورة العلق الجزء 30
اها دي اية برضو كلها خير ، يعني اية بتوري انو الله علم الانسان

لكن بصورة عامة كلمة الانسان ذكرت وهي متبوعة بالشر زي ما قال محسن
لكن ما كلها

ونواصل
  رد مع اقتباس
قديم 05-05-2006, 09:34 PM   #12
الشفت
Guest
 
المشاركات: n/a
افتراضي

محسن خالد كتب

اقتباس:
فيما يُشير إلى الطور الأولي والمرحلي منه، ثم يتحدث عن "الآدمي أو البشري" بصورة أخرى، تشبه أن تكون صورة المُكَلَّف والراشد، صورة البشري الذي زاد جردل "دنقوسه وفاخورته" عن آخر في ماضٍ سحيق كان حجم (رأسه) أصغر، والدماغ الداخلي نفسه "كمادة سائلة ولزجة" كانت أقل أرطالاً بكثير عن (بشري) اليوم،..
(للمزحة بقولوا ليك خليك إنساني، وعندك إنسانية، في حين أنَّ (الإنسان) القرآن مارقو كعب وبتاع دم وبدائي وطور أولي وبرايمري خالص، مفروض يقولوا خليك بشري وآدمي، الشوام بقولوا "زلمة آدمي"، ودي أجمل، من "زول إنساني")،..
يعني واضح في القرآن إنو آدم كان ("مدماك" زيادة) اتولَّى أمرو ربنا بنفسه، والإنسان داك كان قاااعد وتافه ومشهور بالتفاهة والدم، والملائكة فتحت خشومن (قالوا: أتجعل فيها من يُفسد فيها ويسفكُ الدماء، ونحن نسبّح بحمدك ونقدّس لك)،..
يعني هم عارفنّو وشايفنّو، مش موضوع جديد كليةً، كيف يكون (الإنسان) كان مقترح شاورن فيهو الله يادوووب، (إني جاعلٌ في الأرض خليفةً) وهم يكونوا ناقشنوا، أبداً، هم كانوا بتكلموا عن الإنسان، وما عارفين إنو ربنا نوى يطوروا ويعمل من (الفسيخ شربات)، والشربات ياهو آدم ذاتو،..
وبكل اسف يا اديب
اقول ليك دي قلشة شينه
وقلشة باك اشتر كمان

يعني نفهم من كلامك انو في كائن تاني يطلق عليه وصف الانسان وهو مخلوق من طينة تانية غير الطينة المخلوقين منها نحن
حيث ان سيدنا ادم مخلوق من طينة مباشرة ثم نفخت فيه الروح
يعني مدخلات انتاجه براها وخام كمان

وفي الحالة دي نحن البشر – كما قلت – نبقى في حل من اي اية قرآنية مذكورة فيها مفردة انسان ، لانها بتخص نوع تاني من المخلوقات
التطور الذي افهمه انا ، ان يكون ادم نتاج والدين من الكائن الذي ذكرته ، او يكون ترفيع لاحد الكائنات بتدخل مبارشر من الخالق
موش يجيبوا طينة جديدة لنج وينفخوا فيها روح خالق وده يكون تطوير لي داك
نحن هنا ما بنتكلم عن مصانع تايوتا
ولا بنتكلم عن الكريسيدا البقت كامري

اها ده كلو كوم والاية دي كوم براااااااها
"لقد خلقنا الإنسان في أحسن تقويم"
ص 597 اية رقم 4 سورة التين الجزء 30

اها الخلقوه في احسن تقويم ده ياتو فينا
نحن ولا اسلافنا الما عندنا معاهم تسلسل ممكن يخليك تقول ده جدي القديم
ما يا اما الخالق يكون قاصد الانسان القديم وفي الحالة دي كلامك عن وجود انسان قبلينا بكون صااااااااح
لكن الغلط في وصفك ليه بالرويس الصغيروني وبشاعة الخلقة والاخلاق لانو بتعارض مع الايه دي
او نكون مقصودين بيه نحن الاصدارة التانية وفي الاصح الاصدارة الوحيدة للبشر هنا بتكون نظريتك انت وداروين كلها غلط في غلط

نحن الذين خقلنا في احسن تقويم يا محسن
ما مخلوق تاني

اها كلمة انسان هنا جات صدفة
ولا غلط والتعبير
ولا كيف
؟؟؟؟؟؟؟؟؟؟؟؟
!!!!!!!!!!!!!!!!


يعني هسع سورة زي العصر دي مقصود بيه مخلوق تاني في فترة زمنية تانية
يعني كل الحكمة الموجوده في السورة دي تاريخ !!!!!!
وطيب السبب شنو في الحليفة وكت الموضوع تاريخ
ليه الرحمن قال وهو يقسم
وَالْعَصْرِ (1) إِنَّ الْإِنسَانَ لَفِي خُسْرٍ (2) إِلَّا الَّذِينَ آمَنُوا و عَمِلُوا الصَّالِحَاتِ و تَوَاصَوْا بِالْحَقِّ و تَوَاصَوْا بِالصَّبْرِ (3)

كل الحكمة في السورة دي تاريخ وبس
؟؟؟؟؟؟؟
!!!!!!!!!

سورة فيها مفاتيح النجاح في كل شي ، صحيح مقصود بيها النجاح الاعظم وهو نيل رضا الخالق ودخول جنة عرضها السموات والارض
لكن هي كشف لاسباب النجاح في كل امتحان وعمل

فيها رشتة لي اسباب النجاح في اي عمل
الايمان بالعمل الذي تقوم به يعني القناعة بي لغة المثقفاتية اليومين ديل
عمل ما هو صالح لهذا العمل يعني تكد وتثابر وتجد في سبيل قناعتك
التواصي بما هو حق لهذا العمل ( وهنا ده الكلام عن حرية التعبير لكن حرية بي فهم وحق موش كلام مشوتر وكمان هي دعوه للعمل في مجموعات توصي بعضها وتذكر بعضها حينما ينسى بعضهم او يقل ايمانهم )
والصبر لان النتائج قد تاتي متاخرة وتحتاج الي مثابرة ومواصلة

دي موقمات النجاح في اي شي

اها الكلام ده كلو ما بخصنا نحن ولا عندنا بيه شغلة
؟؟؟؟؟؟؟؟؟؟؟؟

اها نسال السوال المهم جدا

وينو هو الانسان البتتكلم عنو ده ؟
انقرض مع الديناصورات في العصر الجليدي ؟
ولا في حادثة سقوط نيزك المكسيك القديم؟
ولا يمكن مع الطوفان ، ولحق لحدي سيدنا نوح لكن غرق وانقرض عشان ما ركبوه المركب ؟

"حَتَّى إِذَا جَاء أَمْرُنَا وَفَارَ التَّنُّورُ قُلْنَا احْمِلْ فِيهَا مِن كُلٍّ زَوْجَيْنِ اثْنَيْنِ وَأَهْلَكَ إِلاَّ مَن سَبَقَ عَلَيْهِ الْقَوْلُ وَمَنْ آمَنَ وَمَا آمَنَ مَعَهُ إِلاَّ قَلِيلٌ"
  رد مع اقتباس
قديم 24-06-2011, 02:08 PM   #13
محسن الفكي
 
تاريخ التسجيل: Nov 2005
المشاركات: 24,418
Icon23 حق الناس تشوف وحقك ما تشوف

اقتباس:
المشاركة الأصلية كتبت بواسطة محسن الفكي مشاهدة المشاركة
تهانيّ بالفوز للجميع وأخص لينا ويسرا وكل من له اخ /ت ابن/ة ،قريب حبيب نسيب... الخ الخ ممتحن.
الرقيب يكره أخطاء الإملاء



ودالجريف كتب ادمان الفشل ،وأضيف البنقو،مع إقتراب اليوم العالمي للبنقو.
اقتباس:
المشاركة الأصلية كتبت بواسطة الشفت مشاهدة المشاركة
وبكل اسف يا اديب ..اقول ليك دي قلشة شينه..وقلشة باك اشتر كمان
وهسه يا وليد زي قلشتك العملتها في موقع وزارة التربية والتعليم دي يسموها قلشة شنو
يعلموا فيكم في المدارس والمنتديات وكلو كلو المحصلة عدم إتقان العمل والعجلة والكلفحة
هسه لو بقيت نائب في الثورات كان يكون موقفك كيف وانت في مجال تخصصك فشل محسن خالد يصلح كتابتك.

قبل شوية ود الشيخ كتب 69 شخص بيشاهدوا في الموقع الذي هو من تصميمك
وقبلها "كبشرت" 46 فردا
خسارة يا شفت تعرفوا بس تنتقدوا الآخرين والحكومة ، وترون القذي بعينها
اما الخشبة التي بأعيـــــــنكم لا ترونها..!

محسن الفكي غير متواجد حالياً   رد مع اقتباس
قديم 24-06-2011, 02:33 PM   #14
عبد السلام
 
تاريخ التسجيل: Jan 2010
المشاركات: 2,069
افتراضي رد: محسن خالد – أصلحت الكتابة في المنبر .. فمن يصلح ما تفسد ؟

وليد المبارك عضو في الأوفلاين ؟؟!!

أي نعم أنا قبل كدة قريت لي ود الشيخ بوست بدعم فيه حملته الانتخابية بي وصفه عضو في المنبر

لكن دي تفسروها لي كييييييييييييييف؟
اقتباس:
الشفت
Guest

المشاركات: n/a
عبد السلام غير متواجد حالياً   رد مع اقتباس
قديم 24-06-2011, 02:40 PM   #15
محسن الفكي
 
تاريخ التسجيل: Nov 2005
المشاركات: 24,418
افتراضي تفسير

اقتباس:
المشاركة الأصلية كتبت بواسطة عبد السلام مشاهدة المشاركة
وليد المبارك عضو في الأوفلاين ؟؟!!
أي نعم أنا قبل كدة قريت لي ود الشيخ بوست بدعم فيه حملته الانتخابية بي وصفه عضو في المنبر
لكن دي تفسروها لي كييييييييييييييف؟
عشان هو ما أساسي
محسن الفكي غير متواجد حالياً   رد مع اقتباس
قديم 24-06-2011, 02:48 PM   #16
عبد السلام
 
تاريخ التسجيل: Jan 2010
المشاركات: 2,069
افتراضي رد: محسن خالد – أصلحت الكتابة في المنبر .. فمن يصلح ما تفسد ؟

لا لا ما أعتقد

ود الشيخ دعا الناس في المنبر دة للتصويت ليه في الانتخابات وبتذكر في ناس استنكروا الكلام دة وقالوا لو هو حريص علي أصواتنا كان جانا بي نفسو

حرص ود الشيخ على أساسي ما أقل من حرصه على وليد حسب بوست الترشيح

لكن اكيييييييييييد في آكشن حصل خلاهو ما عضو
أنا شمار مني ساي عاوز أعرف الآكشن دة
عبد السلام غير متواجد حالياً   رد مع اقتباس
قديم 24-06-2011, 02:49 PM   #17
العمدة
 
الصورة الرمزية العمدة
 
تاريخ التسجيل: Aug 2008
المشاركات: 7,483
إرسال رسالة عبر MSN إلى العمدة إرسال رسالة عبر Yahoo إلى العمدة إرسال رسالة عبر Skype إلى العمدة
افتراضي رد: محسن خالد – أصلحت الكتابة في المنبر .. فمن يصلح ما تفسد ؟

لا تنهى عن فعل و تأتى بمثله عيب عليك ان فعلت عظيم
__________________
العمدة غير متواجد حالياً   رد مع اقتباس
قديم 29-06-2011, 06:56 PM   #18
عبد السلام
 
تاريخ التسجيل: Jan 2010
المشاركات: 2,069
افتراضي رد: محسن خالد – أصلحت الكتابة في المنبر .. فمن يصلح ما تفسد ؟

اقتباس:
المشاركة الأصلية كتبت بواسطة haneen bakri مشاهدة المشاركة
بطلى الفوقية بتاعة عمك مهدى دى
والتعاطى الانتقائى مع الاشياء
شكلو كلامك صاح يا حنين لأني سألت فوق وشختوا لي
عبد السلام غير متواجد حالياً   رد مع اقتباس
قديم 01-07-2011, 01:22 PM   #19
الدرديري
Incomparable Member
 
الصورة الرمزية الدرديري
 
تاريخ التسجيل: Jul 2009
الدولة: Sudan
المشاركات: 8,901
افتراضي رد: محسن خالد – أصلحت الكتابة في المنبر .. فمن يصلح ما تفسد ؟

اقتباس:
المشاركة الأصلية كتبت بواسطة عبد السلام مشاهدة المشاركة
شكلو كلامك صاح يا حنين لأني سألت فوق وشختوا لي
الأخت حجه آمنه للإجراء
__________________
بلداً قوي ومقدام .... زيَّك حرام يِنضام
الدرديري غير متواجد حالياً   رد مع اقتباس
قديم 01-07-2011, 11:03 PM   #20
حجة امنة
 
الصورة الرمزية حجة امنة
 
تاريخ التسجيل: Jul 2010
المشاركات: 2,248
افتراضي رد: محسن خالد – أصلحت الكتابة في المنبر .. فمن يصلح ما تفسد ؟

إتا يا الدرديري بدل حركات الصفقة فوق ال إتعلمتهن اليومين ديل وقع لي عبدالسلام أخوك دا الحاصل ؛ غااايتو
__________________

مازلت أسكن بيت قصيدي
وأعبد الله

اللهم لا إله إلا أنت سبحانك إني كنت من الظالمين

...
حجة امنة غير متواجد حالياً   رد مع اقتباس
قديم 01-07-2011, 11:10 PM   #21
حجة امنة
 
الصورة الرمزية حجة امنة
 
تاريخ التسجيل: Jul 2010
المشاركات: 2,248
افتراضي رد: محسن خالد – أصلحت الكتابة في المنبر .. فمن يصلح ما تفسد ؟

اقتباس:
المشاركة الأصلية كتبت بواسطة عبد السلام مشاهدة المشاركة
لا لا ما أعتقد

ود الشيخ دعا الناس في المنبر دة للتصويت ليه في الانتخابات وبتذكر في ناس استنكروا الكلام دة وقالوا لو هو حريص علي أصواتنا كان جانا بي نفسو

حرص ود الشيخ على أساسي ما أقل من حرصه على وليد حسب بوست الترشيح

لكن اكيييييييييييد في آكشن حصل خلاهو ما عضو
أنا شمار مني ساي عاوز أعرف الآكشن دة
القصة دي ما أظن إنو فوقا أكشن ولا حاجة ؛ لانو تحت اسم الشفت موضح انو ضيف ما مكتوب إنو تم حظرو ؛ إتخيل لي العضو بيبقى ضيف إذا مرت فتره محدده بدون مايسجل حضور بالعضوية حقتو ؛ أعتقد إنو يتم وقفو أليا بدون تدخل إشراف ؛ والله أعلم .
__________________

مازلت أسكن بيت قصيدي
وأعبد الله

اللهم لا إله إلا أنت سبحانك إني كنت من الظالمين

...
حجة امنة غير متواجد حالياً   رد مع اقتباس
قديم 01-07-2011, 11:19 PM   #22
ودالشيخ
مشرف
 
الصورة الرمزية ودالشيخ
 
تاريخ التسجيل: Sep 2011
المشاركات: 26
افتراضي رد: محسن خالد – أصلحت الكتابة في المنبر .. فمن يصلح ما تفسد ؟

اقتباس:
المشاركة الأصلية كتبت بواسطة عبد السلام مشاهدة المشاركة
شكلو كلامك صاح يا حنين لأني سألت فوق وشختوا لي
لا يا عبد السلام مافي شخيط لكن حنين دي يوم بتركبني التونسية
زي ما قالت ليك حجوج الاعضاء الذين لا يدخلون المنبر لمدة
طويلة تشطب الداتا تلقائيا
ويبقوا ضيوف ولكن تاريخهم موجود في الارشيف ولو عاد بنفس الاسم
لا يستطيع الا اذا تم عن طريق الادارة وبعنوان بريد جديد
ويبداء العد من واحد حتى لو كان لديه الف مشاركة
الموقوفون يبين تحت اسمهم ( باند )
تحباتي
__________________
متفائل بأمل جديد
ودالشيخ غير متواجد حالياً   رد مع اقتباس
إضافة رد

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

المواضيع المتشابهه
الموضوع كاتب الموضوع المنتدى مشاركات آخر مشاركة
اذا كان كرهي للانقاذ جريمة فليشهد التاريخ اني مجرم الرائد جلال البدوي ابو حراز منبر الأعضاء الـحــــر 3 04-11-2007 02:36 PM


الساعة الآن 08:44 PM


Powered by vBulletin® Version 3.8.7
Copyright ©2000 - 2014, vBulletin Solutions, Inc.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل الرأي الرسمي لصاحب الموقع أو سودانيز اوف لاين بل تمثل وجهة نظر كاتبها .