حكاية ريد لي فاطنة السمحة
[OVERLINE]
مدخل:[/OVERLINE]
أحبك
كلمة وحيدة بنقولا
وما بننساها نحن فداها يا عازة
عيونك نيلك السامي
بنحب نغرق في عينيكي
وأياديك نخلك السامق
نحب نوصل أياديكي
وخصرك أرض مروية
أحب أملابو ايدية
سودانية سودانية
ما بننساها نحن فداها يا عازة
أجيك يا مهيرة أتقدل
أقول أعمل بدور أعمل
منو البعمل غيري نا
تزغردي لي وتفرحي بي
وفاطنة السمحة تتنا
أشيل مخلاية
وانتي معاي
تتفجر ينابع ريدنا ما بتجف
ولا بينضب معين احساسنا
أخت ايديكي في ايديا
ونشيل الطين ونرسم أمنا الجاية وأحبك
[OVERLINE]النص:[/OVERLINE]
يا حبوبة من ما قمنا نحن عشقنا فاطنة السمحة
شايلة مكارم الأخلاق ولابسة الطرحة
ما بتتهان
نمت فينا وبتسند فوق خطاوينا
وتقول للغول
محمد في هواي مكتول
محمد مني نا المسئول
وهو المسئول ونحن صغار
شلنا معاهو هم الدنيا
كيف يزرع وكيف يحصد
وكيف الزول يريد الزول
وكيف الزول يكون مسئول
وكيف نحفظ بلدنا وكيف نكاتل لي حماها نقيف
وما نتهان
عرفنا الدنيا كل الدنيا
يا حبوبة من غنية
بتقولها السمحة لي خوها
وبتعرفي السمحة لما تغني لي خوها
بتسعد كل من جوها وما بتنهان
أصيلة أصيلة يا فطومة
حقوقك كيف تكون مهضومة
وانتي السمحة ما في متيلك
انتي العزة موية نيلك
عيونك عازة السودان
وثغرك لؤلؤا مرجان
وما بتنهان
لي ود النمير الكان
يشوف في فاطنة سرية
وحجتوا سنة دينية
ويقول لمحمد المنصور
بشوف فاطنة بتكون ليا
وعرفتي الجاهو يا حبوبة من ديا
وفهمتي الجاهو يا حبوبة من ديا
وشفتي الجاهو
أسدة ونمرة ومرفعين الجبال
أم سنونا طوال سيدم سندو
وفاطنة عزيزة كيف تنهان
تقول للغول
أكان داير تشيل محصول
زرعوا محمد المأمول دحين حاول
محمد مالوا أبدا سيد
محمد مو البحمل القيد
ونحن نعيد
معاكي قصة الأشواق من الأول
وكت أكنا صغار من حولك
نشيل في قيمنا بالجملة
وندفي جسومنا في حضنك
ونبكي كتير وتبكي كتير
ود النمير ختف فاطنة
محمد هاج ونحن بكينا كنا سغار
وما عارفين ننط أسوار بناها الغول
وشال محصول سقوهو بي شعاع النار
محمد كان كلاموا جميل
قشقش دمعة الأطفال
وقال يا شتلة مرية بي دمعة ريد لي فاطنة السمحة
داك طريق أعرفوهوا
وقال حبوبة ما تبكي
بتقولي بكانا نحن نضال وبرضوا بكانا نحن نضال
كبرنا سريع وبقينا السيل
وكان ابريل
ضريبة ريد وكان تهليل
وكان فرحا كبير بالحيل
نضالاتوا بتشد الحيل
بقول يا فاطنة يالسمحة
انت الغنوة والمدحة
وانتي الدقة في الطنبور
وانتي صدور
مشبعة بي عبير ريدك
وانتي الدوكة
انت البامية مفروكة
وانتي شتم بيخلف عزف دلوكة
وانتي هوانا انتي دوانا
ما بنطيق فراقك مر يالسمحة
لما يجينا همنباتي
ودة النمير المات يقولوا جانا بعاتي
ويختف فاطنة في تلاتين
وهو المسكين
أكان بعرف حلاوة الطين
أكان بفهم غلاوة الطين
أكان عندوا حبيبة دين
ما كان قام لينا من قبرا وكان خاتي
وهو العارف بي ريد فاطنة نحن الديمة بنهاتي
ونحلم بي زمن آتي
ونعيش للآتي من زمنا بعيد بالحيل وهو الضليل
محمد قالا كلمة زمان
محمد ماهو زول بيتهان ونحن معاهو ما بنتهان
بنحرق دفتر الأحزان ونعيش للريد
أصلو الريدة قصة طويلة ما بتكمل
مما قمنا عشناها وشلنا الهم مع محمد
كيف يزرع كيف يحصد
وكيف الزول يريد الزول وكيف الزول يكون مسئول
وكيف نحفظ بلدنا وكيف نكاتل لي حماها نقيف
وما نتهان
رد مع اقتباس
