مركز تحميل الملفات



العودة   المنتديات > منبر الأعضاء الـحــــر

منبر الأعضاء الـحــــر لمـنـاقـشـة المـواضـيع العــامـة منتدى خاص بالاعضـاء

« آخـــر الــمــواضــيــع »
         :: شوكة المقاومة العراقية تفقأ عين الاسد (آخر رد :أقبـــــال)       :: الزاكي طمل: البلايا في طي المزايا البطولة والمأساة (آخر رد :ود الشيخ)       :: البرلمان الأمريكي يتبنى مشروع قرار إبطال التفويض باستخدام القوة العسكرية في العراق (آخر رد :أقبـــــال)       :: ثلاثة مليون دولار مكافأة واشنطن لمن يدلي بمعلومات عن المهاجمين لقواتها في العراق (آخر رد :أقبـــــال)       :: بني شنقول : عمر البشير كان بيد الأثيوبيين كالميت بين يدي غاسله (آخر رد :الثلج الساخن)       :: هجوم صاروخي على قاعدة بلد الجوية تضم قوات امريكية (آخر رد :أقبـــــال)       :: اليوم العالمي للتذكير بضحايا الحرب العالمية الثانية : ٨ و ٩ يونيو (آخر رد :الثلج الساخن)       :: نيويورك تايمز: أمريكا تعيش حالة من الرعب بسبب الطائرات المسيرة لفصائل المقاومة العراق (آخر رد :أقبـــــال)       :: أخبرونـي عن نفط العرب ,هل بقـي شيء منه للعـرب !! (آخر رد :أقبـــــال)       :: زفرات حرة ( قحت والميتة ام رمادا شح ) (آخر رد :ود الشيخ)      

إضافة رد
 
أدوات الموضوع انواع عرض الموضوع
قديم 16-05-2021, 08:11 PM   #1
الثلج الساخن
 
تاريخ التسجيل: May 2019
المشاركات: 276
افتراضي المعذرة يا ثوار : ما تخشوا المناطق المحظورة عسكرياً بدون تصريح عسكري

الواحد مننا ب يحس بزعل شديد وغيظ شديد ,
لما يتذكر قتلى اعتصامات القيادة العامة
للقوات المسلحة اللي وقعوا في السنتين
اللي فاتوا ديل.

والواحد مع روحو بقى يتخيل إنو مهما حاول
يشارك في عمل مفيد لصالح قضية القتلى
ما ح يقدر يكسب أي حاجة ملموسة .

الدماء الي أُهدرت في الإعتصامات كان يمكن تُصان
والرصاص والعنف اللى نزل على المعتصمين
كان أساسن ما ضروري.

لو المعتصمين فضلوا ألف شهر زي رمضان,
قدام القيادة العامة ما كانوا ح يقدموا أو يأخروا في
أي حاجة مهمة يمكن تأثر على عساكر اللجنة الأمنية,
أو على مستقبلهم السياسي بعد تحفظهم على البشير.

إعتصام القيادة العامة 2019
كان اعتصام سلمي الى أبعد درجة,
والمعتصمين القتلى كانوا ناس غير مسلحين على الإطلاق,
كانوا مجرد ناس بايتن على نية الصوم وإكمال الفريضة
والحفاظ على صلابة الثورة.

ولكن فجأة
" حدس ما حدس " ,
(والسيجا رة في يده, والإبتسامة ترقص على وجهه.)

ودي لوحدها لو فهمتها,
حقيقة كافية تخليك تتخيل مدى الحقد,
اللي ب يكنّه العساكر في السودان (بالغريزة )
للحياة المدنية الحرة,
وتخليك تفهم مدى استهانتهم,
بحياة المدنيين (مش في السودان بس ) ,
بل في كل مكان,
وتخليك تفهم مدى كراهيتهم لكل العُزّل
الأبرياء من السلاح والعنف وعقد الجندية.
__________________
الما بقدر يخت أفكارو في "التلج"
أحسن ما يخش النقاش "الساخن"

الثلج الساخن غير متواجد حالياً   رد مع اقتباس
قديم 16-05-2021, 08:14 PM   #2
الثلج الساخن
 
تاريخ التسجيل: May 2019
المشاركات: 276
افتراضي رد: المعذرة يا ثوار : ما تخشوا المناطق المحظورة عسكرياً بدون تصريح عسكري

ولكن قبل الإنعطاف بمشاعر الغضب الغيظ,
وقبل كل حقيقة يمكن نصل ليها أو نكتشفها,
حقو نسأل روحنا (هذا ) السؤال :

هل منطقة القيادة العامة اللي حصلت فيها ملاحم المعتصمين
في أبريل 2019,
هل هي أساسن منطقة عسكرية محظورة على المدنيين ؟
ولا لأ ؟

وحقو نستفيد من الإجابة على السؤال ده,
في طرح أسئلة تانية مفيدة ,
يمكن تساعدنا ننظم ونتحكم
في مبادرات الإحتجاج الثوري المستقبلية.
وفي أي مواجهة من من المواجهات ( السلمية ) المحتملة
ضد اللجنة الأمنية للبشير.

إذا كانت الإجابة على السؤال اللي فوق : أيوه
منطقة الإعتصام هي منطقة عسكرية محظورة على المدنيين ,
ف شنو اللي كان ب يتوقعوه الثوار
لما دخلوا المنطقة دي وضربوا فيها الخيام سنة 2019؟

هل كانوا ب يتوقعوا .. من العساكر سلام بالأحضان ( مسلن) ؟
هل كانوا ب يتوقعوا : هاكم ( يا ثوار ) القيادة العامة ( أهي ) دي
ومنسوبيها ( أهم ) ديل تحت تصرفكم ؟

هل فعلن صدّق الثوار روحهم لمّا كانوا ب يهتفوا قدام القيادة العامة
هتافهم البرئ "الجيش معانا وما همّانا" ؟

في ناس مصدقين الكلام الفارغ ده لحدي هسي
حتى بعد اللي حصل قبل أيام ,
في الإفطار الجماعي لأسر الشهداء .

من متين الجيش السوداني كان مع أي ثورة مدنية ؟؟
ومنو أل خلاك يا ثائر تفتكر إنو الجيش السوداني ح يغيّر طبيعته,
بس لمجرد إنك لجأت ليه ولُذت بحماه ومنطقته ؟

مين يا ثائر أقنعك بالخرافة دي ؟
مين أقنعك إنو خلاصك من الإنقاذ
ح يكون بالإعتصام أمام القيادة العامة ؟
هل هم الناس اللي كانوا جنبك وحواليك
وإنت ب تتظاهر في الشوارع في أبريل 2019 ؟

طيب, أسأل نفسك هل كنت ب تعرف كل
اللي كانوا جنبك وحواليك اليامات ديك ؟

ما بتعرفهم ولاحاجة .

ولكن بصرف النظر هم مين ,
حقو تعرف ياثائر
إنو ثورة ديسمبر ضلت طريقها إلى القيادة العامة
بل غُرر بها الى هناك ,
وإنو من قاد الثوار إلى القيادة العامة ل
م يقصد مصلحة الثورة إطلاقاً,

وحقو تصدّق يا ثائر صلاح قوش لمّا يقول ليك
إنو هو الي فتح ليك شوارع القيادة العامة,
لأنو يمكن فتحها ليك ما عشان مصلحتك أو مصلحة الثورة
يمكن فتحها ليك عشان تمشي برجلينك وتشوف النار بعينك .
__________________
الما بقدر يخت أفكارو في "التلج"
أحسن ما يخش النقاش "الساخن"

التعديل الأخير تم بواسطة الثلج الساخن ; 16-05-2021 الساعة 08:19 PM
الثلج الساخن غير متواجد حالياً   رد مع اقتباس
قديم 16-05-2021, 08:22 PM   #3
الثلج الساخن
 
تاريخ التسجيل: May 2019
المشاركات: 276
افتراضي رد: المعذرة يا ثوار : ما تخشوا المناطق المحظورة عسكرياً بدون تصريح عسكري

ف كنتيجة ل " حدس ما حدس " ,
عندنا هسة عشرات وعشرات المقتولين والمخفيّين
ما عارفين مين الجهة المسؤولة من قتلهم وإخفائهم,

وحتى لو عرفنا على مين (تحديدن) تقع المسؤولية الجنائية.
ما حنقدر نستفيد ( سياسياً) من التقدم ده.
لأنو بالتأكيد ح يفلت الكبار من المسؤولية.

ما ح نقدر نقدم الجناة الحقيقيين ( حملة السلاح ) إلا لمحكمة عسكرية,
ولكن ما في محكمة عسكرية ب تجرم منسوبي الجيش والقوات النظامية
إذا فتح منسوبوها النار وفقاً للقانون على أعيان أو أشخاص أو جهات
ثبت تواجدهم بدون تصريح عسكري في منطقة محظورة عليهم عسكرياً.

مش ديل هم ثوار ديسمبر ذاااتهم ؟
مش كانوا معتصمين بدون تصريح عسكري في منطقة القيادة العامة ؟

اتخيل ياثائر أي محاكمة عسكرية ( حتى لو عادلة )
ثبت فيها إنو قتلى الإعتصام كانوا موجودين
بدون تصريح عسكري في منطقة القيادة العامة ؟

العدالة وقتها ح تكون حاجة ما جذابة للثوار .

الناس ب تستغرب
إنو الكيزان ردموهم بمبان في إفطارهم في رمضان الفات,
بينما أسر شهداء الثورة ضربوهم رصاص حي.

مش يمكن يكون السبب
إنو الكيزان أفطروا في حديقة عامة وبتصريح ,
بينما أفطرت أسر الشهداء في منطقة عسكرية ( القيادة العامة ) ,
وبدون تصريح عسكري.
__________________
الما بقدر يخت أفكارو في "التلج"
أحسن ما يخش النقاش "الساخن"
الثلج الساخن غير متواجد حالياً   رد مع اقتباس
قديم 16-05-2021, 08:26 PM   #4
الثلج الساخن
 
تاريخ التسجيل: May 2019
المشاركات: 276
افتراضي رد: المعذرة يا ثوار : ما تخشوا المناطق المحظورة عسكرياً بدون تصريح عسكري

ما في فرصة مؤكدة للإقتصاص من قتلة الشهداء,
إلا تحت تحكيم مدني مؤيد بالديمقراطية الشعبية.
وده حالياً بقى شئ مستبعد.

لكن الممكن هسه إنو الجماهير إذا عملت إعتصامات ,
تعملها في مناطق مدنية وبس.

برضو في الحالة دي ,
ما أتوقع إنو العساكر ح يسكتوا ,

ح يقوموا أكيد ينتهكوا حُرمة المعتصمين في أي مكان,
دي ما عايزة ليها اتنين تلاتة.

لكن الثوار ح يتكبدوا على الأقل خسائر خفيفة,
وفي نفس الوقت , ح يكسبوا
نتائج مستقبلية كببيرة ومضمونة من الناحية السياسية والقانونية.

فبالمختصر يا ثوار
أعملوا أي حاجة ولكن,
ما تخشوا المناطق المحظورة عسكرياً بدون تصريح عسكري .

شوفوا حصل شنو لمّا الجماهير المصرية
اعتصمت في ميدان التحرير,
وهو منطقة مدنية بامتياز ,

حصل شنو ؟
حصلت أعظم ثورة في التاريخ ,
ثورة أعظم من ثورتنا السودانية ,
ثورة يناير 2011 المصرية,
ثورة قام بيها أخوانا المصريين صغار وكبار,

كسرة :

في الحقيقة,
ثورة يناير 2011 المصرية
ثورة أعظم من ثورتنا السودانية بدرجات,
ولكنها بقت أفشل من ثورتنا بدركات.
__________________
الما بقدر يخت أفكارو في "التلج"
أحسن ما يخش النقاش "الساخن"
الثلج الساخن غير متواجد حالياً   رد مع اقتباس
قديم 16-05-2021, 08:27 PM   #5
الثلج الساخن
 
تاريخ التسجيل: May 2019
المشاركات: 276
افتراضي رد: المعذرة يا ثوار : ما تخشوا المناطق المحظورة عسكرياً بدون تصريح عسكري

كسرة :

إذا كانت الإجابة على السؤال اللي فوق : لأ,
منطقة الإعتصام هي ما منطقة عسكرية ,
وما محظورة على المدنيين ,

فارجع هناك .. إعتصم تاني يا ثائر.

الثلج الساخن
__________________
الما بقدر يخت أفكارو في "التلج"
أحسن ما يخش النقاش "الساخن"
الثلج الساخن غير متواجد حالياً   رد مع اقتباس
إضافة رد

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع


الساعة الآن 07:17 PM


Powered by vBulletin® Copyright ©2000 - 2021, Jelsoft Enterprises Ltd. TranZ By Almuhajir
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل الرأي الرسمي لصاحب الموقع أو سودانيز اوف لاين بل تمثل وجهة نظر كاتبها .